Në pritje të ditës së begatë të Kurban Bajramit, Myftinia Shkodër është angazhuar për ta reflektuar atmosferën e gëzueshme të kësaj feste edhe nëpërmjet afisheve të ndryshme dhe parullave me urime të shumta, në rrugët kryesore të qytetit.
           
Qëllimi i vendosjes së këtyre afisheve është sensibilizimi i muslimanëve shkodranë dhe i vizitorëve të ndryshëm që hyjnë në kryeqendrën e Veriut me atmosferën e kësaj feste të madhnueshme, që rrezaton mirësi dhe begati hyjnore dhe nxitjen e frymës së vëllazërimit dhe harmonisë fetare në Shkodër.
           
Nëpërmjet këtyre parullave, Myftinia Shkodër dëshiron të urojë të gjithë besimtarët muslimanë me rastin e Kurban Bajramit dhe njëkohësisht të lutet për mirëqenie, harmoni, paqe dhe begati në shtëpitë e krejt besimtarëve.
           
Parullat e urimit janë vendosur në hyrje të qytetit në Bahçallek, te Ura e Bunës, në Perash, në Parrucë, në Rus, në Piacë, te Radio Shkodra etj.