Paraditën e së shtunës, më 22 tetor 2011 ka mbërritur për një vizitë në Shkodër z. Ylber Fetahu, anëtar i bordit të Qendrës Islame Shqiptare Amerikane në Phoenix të Arizonës, si dhe muezin në “Greenway Masjid”. Në shoqëri të tij ka qenë edhe imami i nderuar nga Dibra e Madhe, z. Xhemail Çupi.
           
Në bisedën e përzemërt, në zyrën e Myftiut Imam Muhamed Sytari, vizitorët kanë shprehur kënaqësinë e kësaj vizite në qytetin e Shkodrës. Njëkohësisht ata kanë diskutuar në lidhje me domosdoshmërinë që ka lidhja dhe afrimi i muslimanëve dhe imamëve me njëri-tjetrin.
           
Në fjalën e tij, Myftiu i Shkodrës ka shprehur gëzimin e tij për këtë vizitë. Ai ka shprehur mirënjohjen e tij për Qendrën Islame Shqiptare Amerikane të Phoenix, në Arizona, si dhe të drejtuesit të saj Imam Didmar Faja, për kontributin e madh në ruajtjen e traditave fetare islame për komunitetin musliman shqiptar atje, por jo vetëm.  

Myftiu ka theksuar se një kontribut i vyer i kësaj Qendre Islame që po afirmohet dita-ditës për mesazhet e harmonisë dhe vlerave të kulturës së besimit islam, është edhe revista e saj “Udhëzimi”. Myftiu ka vënë në dukje se gjurmët e shkruara sot, janë historia që u lëmë pas brezave të nesërm, të cilët do të gjykojnë veprat e kohës sonë.
           
Në fjalën e tij, Myftiu ka falënderruar për vizitën edhe imamin nga Dibra e Madhe, z. Xhemail Çupi, duke theksuar se ka ardhur dita që Myftinitë e trevave shqiptare të afrohen edhe më shumë, me aktivitete të përbashkëta dhe iniciativa të dobishme për bashkësitë muslimane të vendeve përkatëse.
           
Më pas, Myftiu dhe vizitorët kanë këmbyer dhuratat e kësaj vizite, si simbole të një miqësie dhe vëllazërie të fortë dhe të shëndoshë.
           
Gjatë kësaj vizite në Shkodër, z. Ylber Fetahu dhe z. Xhemail Çupi, të shoqëruar nga Myftiu i Shkodrës, kanë falur namazin e mesditës në xhaminë e Parrucës, ku kanë mbajtur edhe një fjalë përshëndetëse për besimtarët e pranishëm. Ndërkohë, pas drekës së shtruar për nder të vizitorëve, ata kanë falur namazin e iqindisë në xhaminë “Ebu Bekër” dhe kanë bërë një vizitë në disa prej stacioneve tradicionale të kulturës dhe qytetarisë së Shkodrës.