Paraditën e së shtunës, më 17 shtator 2011, Myftiu i Shkodrës Imam Muhamed Sytari ka pritur në një takim të ngrohtë dhe miqësor një përfaqësi të Asamblesë së Përgjithshme  të Komisioneve Drejtësi dhe Paqe të Evropës, të cilët ndodhen në Tiranë nga dita e djeshme, ku është zhvilluar edhe konferenca me temë “Marrëdhëniet ndërkulturore dhe ndërfetare, mundësi dhe sfidë për një të ardhme të përbashkët.  Një kontribut i Shqipërisë për ndërtimin e Evropës”.

Në pritjen që Myftiu ka rezervuar për vizitorët nga disa shtete të Evropës, si: Danimarka, Skocia, Spanja, Austria, Polonia, Gjermania, Belgjika, Lituania etj, është diskutuar rreth besimit dhe rolit që ka feja në edukimin e shoqërisë.

Gjatë takimit të zhvilluar në xhaminë e Parrucës, Myftiu ka përmendur se: “Rreth 14 shekuj më parë, profeti Muhammed (a.s), priti në xhaminë e tij një delegacion me besimtarë të krishterë. Kam kënaqësinë t’ju uroj mirëseardhjen në Shkodër dhe në këtë xhami, për të dëshmuar sëbashku dëshirën e mirë të dialogut ndërfetar dhe ecurisë së tij edhe përtej kufijve të vendeve ku në jetojmë”.

Në këtë takim, vizitorët i kanë drejtuar Myftiut pyetje të shumta, në mesin e të cilave edhe në lidhje me edukimin fetar në shkollat publike të Shqipërisë. Këtu, Myftiu është shprehur se: “Në këtë pikë, Shqipëria është shumë larg standarteve evropiane. Edukimi fetar është një domosdoshmëri e madhe në këtë vend me një traditë të shquar besimi. Ndoshta, klasa politike e kësaj kohe është akoma varfanjake për ta merituar nderin dhe fisnikërinë e aprovimit të këtij ligji. Por ky fakt, nuk do të na ndalojë ta kërkojmë këtë të drejtë legjitime për komunitetet fetare dhe besimtarët e vendit tonë”.

Në këtë bashkëbisedim me vlera intelektuale dhe besimore janë trajtuar edhe shumë tema të rëndësishme që kanë të bëjnë me gjallërimin e marrëdhënieve në mesin e komuniteteve fetare për organizimin e aktiviteteve ndërgjegjësuese për shoqërinë, në lidhje me shumë kriza që kalon ajo. Është diskutuar për të drejtat e njeriut, për ndërgjegjësimin e besimtarëve në lidhje me besimin e tyre, për të drejtën e arsimit fetar në shkollat publike, për rrezikun e ateizmit dhe materializmit në jetën e rinisë etj.

Për rreth dy orë, Myftiu dhe vizitorët e tij kanë bashkëbiseduar duke vërtetuar nevojën e madhe të takimeve që bashkojnë bijtë e feve hyjnore në tryezat e dialogut dhe këmbimit të mendimeve në shërbim të forcimit të frymës së harmonisë dhe të besimit në shoqëritë njerëzore.