Paraditën e së dielës, më 28 gusht 2011, Myftinia Shkodër ka organizuar një aktivitet përkujtimor në një vjetorin e ndarjes nga jeta të H. Faik Zaganjorit, njërit prej kuadrove më të spikatur të ringjalljes së aktivitetit të Thirrjes Islame në Shkodër, pas viteve ’90.
           
Aktiviteti ka nisur me këndimin e një pjese kur’anore. Më pas, ka referuar Myftiu i Shkodrës Imam Muhamed Sytari, me temë: “Kujtime dhe nostalgji për kohën e mësuesve...”.
           
Në fjalën e tij, Myftiu ka përmendur disa momente të spikatura nga kujtimet e tij për H. Faik Zaganjorin, si një ndër mësuesit e parë të rinisë muslimane shkodrane, në vitet e para të ringjalljes fetare. Njëkohësisht, ai është lutur që All-llahu ta mëshirojë dhe ta përfshijë me begatitë e Tij të pafundme.
           
Ndërsa teologu Arben Halluni, në referatin e tij: “Kush ishte H. Faik Zaganjori?”, ka hedhur dritë mbi jetën dhe aktivitetin fetar të H. Faik Zaganjorit, duke përmendur se ai ishte një njeri me reputacion të mirë në shoqëri dhe shumë i dashur nga të gjithë.
           
Me shumë emocion është ndjekur fjala e z. Sami Muçej, titulluar: “Kujtime për një koleg të paharruar...”. Referuesi ka rrëfyer disa nga momentet më të bukura të miqësisë së tij me “kënduesin e afirmuar të ilahive, bilbilin e lutjes së mevludit”, H. Faik Zaganjori.
           
Në emër të familjes, ka përshëndetur z. Ali Zaganjori, i biri i të ndjerit. Ai ka falënderuar Myftininë Shkodër për këtë aktivitet që vlerëson personalitetin e njeriut të dashur të familjes Zaganjori dhe gjurmët e lëna prej tij në aktivitetet e ndryshme fetare në të gjitha xhamitë e Shkodrës dhe përtej saj.
           
Në fund të aktivitetit, të ftuarit kanë ndjekur një material në videoprojektor, ku janë shfaqur disa kujtime të bukura nga aktiviteti 20 vjeçar i H. Faik Zaganjorit, si prijës fetar dhe një ndër zërat më të dashur në këndimin e ilahive dhe pjesëve të mevludit.
           
Myftinia Shkodër shpreh mirënjohjen e saj për personalitetin e H. Faik Zaganjorit dhe lutet që All-llahu i Madhëruar ta mëshirojë e ta falë me Mëshirën dhe Faljen e Tij të pëkufijshme.
 

V.Mehmeti