Sofra e begatë e iftarit të Natës së Kadrit, ka mbledhur në një atmosferë festive drejtuesit më të lartë të Myftinisë Shkodër, drejtuesit e pushtetit lokal e vendor, intelektualë, studiues, teologë, shkrimtarë dhe politikanë të sferave të ndryshme në Shkodër dhe përtej saj.

E ftuar në këtë iftar ka qenë edhe Kryetarja e Parlamentit të Shqipërisë, znj. Jozefina Topalli, zv/Ministrja e Arsimit, znj. Nora Malaj, Kryetari i Komitetit të Kulteve, Av. Rasim Hasanaj, deputetë të Shkodrës etj.
           
Në momentin e hapjes së iftarit, Myftiu Imam Muhamed Sytari ka përshëndetur të pranishmit, duke i uruar për agjërimin e kësaj dite të begatë dhe duke u lutur për mbarësinë dhe mirëqenien të gjithëve. Ai ka falënderuar Kryetaren e Parlamentit të Shqipërisë, znj. Jozefina Topalli për prezencën e saj dhe ka shprehur mirënjohjen e tij për të gjithë ata që respektojnë besimet dhe besimtarët në Shqipëri.
           
Në përshëndetjen e iftarit të Natës së Kadrit, znj. Jozefina Topalli, ka uruar besimtarët muslimanë për sakrificën e agjërimit dhe ka vlerësuar se këto momente janë inspiruese për optimizëm dhe besim për një të ardhme më të mirë dhe plot shpresa për shqiptarët.
           
Iftari i Natës së Kadrit ka mbledhur sëbashku drejtuesit më të lartë të politikës në Shkodër, drejtues të ndryshëm të institucioneve shtetërore në vend, prijës fetarë, njerëz të artit, kulturës dhe biznesmenë të ndryshëm.           

Me këtë rast, Myftinia Shkodër shpreh mirënjohjen e saj të thellë për sponsorizuesin e këtij iftari, pronarin e GHE, z. Agron Çela dhe lutet për mbarësinë e tij dhe të krejt biznesmenëve, që kontribuojnë për komunitetin besimtar në Shkodër dhe Shqipëri.