Ditën e enjte, më 25 gusht 2011, Myftinia Shkodër ka organizuar një iftar me motrat muslimane, në prag të Natës së Kadrit. Në këtë sofër të muajit Ramazan, kanë marrë pjesë teologe, mësuese, edukatore, intelektuale dhe besimtare frekuentuese të xhamive të ndryshme të qytetit.
           
Në emër të Myftinisë Shkodër ka përshëndetur teologia Ferzet Ndoja, e cila ka uruar mirëseardhjen e motrave të pranishme. Ajo ka theksuar se kjo sofër është një nxitje më shumë për të forcuar harmoninë dhe bashkëpunimin në mesin e grave muslimane. Ajo ka thënë se muaji i begatë i Ramazanit është një mundësi shumë e rëndësishme që besimtaret muslimane të gjejnë veten e tyre në krahët e mësimeve të shumta që përhap ky muaj i mirësive, si: vëllazërimi, solidarizimi me njerëzit në nevojë, nxitja e bamirësisë, kapja pas mësimeve të Kur’anit dhe traditavë të profetit Muhammed (a.s) etj.
           
Ajo ka falënderuar edhe sponsorizuesin e këtij iftari, duke u lutur që tubime të tilla të jenë sa më të shpeshta, sepse ndihmojnë forcimin e prezantimit të gruas muslimane në shoqërinë ku ajo jeton dhe vepron.           

Iftari i kësaj nate ka qenë i mbushur me biseda të ngrohta rreth besimit, aktivizimit të gruas muslimane në shoqëri, sikurse janë këmbyer edhe këshilla dhe mendime të shumta rreth mirësive të pafund të këtij muaji të begatë.