Duke filluar nga dita e sotme, më 22 gusht 2011, Myftinia Shkodër ka nisur organizimin e faljes së namazit të tesbihëve, shoqëruar me dhikre të ndryshme dhe duanë e rastit, duke filluar nga ora 03.00 e mëngjesit, deri në kohën e ezanit të kohës.
           
Ky organizimi i ri do të vazhdojë për krejt netët e mbetura të këtij muaji të begatë, në mënyrë që besimtarët të përfitojnë sa më tepër nga ditët dhe netët e mira të këtij muaji plot mirësi hyjnore.
           
Që nga ora 03.00 e ditës së hënë, 22 gusht 2011, në xhaminë e Parrucës, nën drejtimin e Myftiut të Shkodrës, është kryer falja e namazit të tesbihëve, e paraprirë nga istgfare dhe pasuar nga lutja e rastit.
           
Siç transmetohet në librat e hadithit dhe të jurisprudencës islame, namazi tesbih, ka një vlerë shumë të madhe dhe një nxitje të spikatur profetike për kryerjen e tij.           

Me këtë rast, Myftinia Shkodër fton besimtarët muslimanë të bëhen pjesë e këtij tubimi shpirtëror, në rrugën e përfitimit nga netët e mbetura të muajit Ramazan.