Me rastin e muajit të begatë të Ramazanit, ditën e martë më 16 gusht 2011, Kryetari i Komunës Bërdicë, z. Besnik Xhemali, ka shtruar një iftar në nder të besimtarëve muslimanë të fshatrave Bërdicë dhe Trush.
           
I pranishëm në këtë iftar ka qenë edhe Myftiu i Zonës Shkodër, Imam Muhamed Sytari. Në fjalën e tij përshëndetëse, Myftiu ka vlerësuar këtë iniciativë pozitive të Kryetarit të Komunës Bërdicë, duke e falënderuar dhe shprehur mirënjohjen e tij për këtë vepër të mirë.

Myftiu ka theksuar se këto sofra bujare shërbejnë për ta forcuar edhe më shumë ndjenjën e besimit në Zotin Një dhe harmoninë e besimtarëve në mes vete. Këtë gjë e ka vërtetuar edhe prania e besimtarëve të besimeve të tjera tradicionale në vendin tonë, të ftuar në këtë iftar.

Myftiu është lutur që Zoti t’i begatojë besimtarët e kësaj zone dhe ta bëjë tokën e tyre pjellore dhe të mbrojtur nga çdo e keqe. Njëkohësisht, ai është lutur që iniciativa të tilla të përhapen sa më shumë në Zonën e Shkodrës, sepse ato sjellin vetëm të mira në komunitet.

Të pranishëm në këtë iftar kanë qenë edhe përfaqësues të prefekturës, imamët e zonës, teologë, intelektualë, biznesmenë dhe besimtarë të shumtë.
           
Në përfundim të këtij iftari, Myftiu ka falur namazin e akshamit me xhematin e fshatit Trush në xhaminë e këtij fshati. Me këtë rast, ai ka mbajtur një bisedë këshilluese për besimtarët e shumtë të pranishëm në xhami, sikurse i ka nxitur ata të përfitojnë sa më shumë nga ditët e mbetura të këtij muaji të shtrenjtë.