Duke nisur nga mbrëmja e së dielës, më 31 korrik 2011, besimtarët muslimanë të Shkodrës dhe mbarë Shqipërisë kanë pritur hyrjen e hënës së re të muajit Ramazan, për të nisur sëbashku adhurimet dhe aktivitetet me rastin e këtij muaji të madhërueshëm.
           
Namazi i teravisë së parë është falur në të gjitha xhamitë e Shkodrës, që kanë dëshmuar mbushjen e tyre me besimtarë të shumtë, të gjitha moshave.
           
Ndërkohë, ditën e hënë, më 1 gusht 2011, nëpërmjet valëve të Tv1 Channel, besimtarët kanë pasur mundësi të ndjekin fillimin e ciklit të emisionit fetar të titulluar: “Ramazani midis nesh”, organizuar nga Myftinia Shkodër dhe drejtuar nga teologu Arben Halluni. Në bisedën e parë në studio, i ftuar ka qenë Myftiu i Shkodrës Imam Muhamed Sytari.
           
Gjatë këtij emisioni, Myftiu ka uruar të gjithë muslimanët me rastin e hyrjes së hënës së re të Ramazanit dhe ka dhënë disa këshilla në lidhje me shfrytëzimin e këtij muaji për t’u afruar më tepër me All-llahun dhe për të forcuar më shumë vëllazërinë dhe harmoninë në mes të besimtarëve muslimanë. Ai i ka bërë thirrje tregtarëve që të ulin çmimet dhe të ndihmojnë njerëzit në nevojë dhe të mos kenë frikë varfërinë dhe skamjen.
           
Ndërkohë një mesazh rreth harmonisë së Ramazanit dhe vlerave të tij, Myftiu e ka dhënë edhe për kanalin Abc News, në një lidhje direkte më studion e saj në Shkodër.
           
Pas namazit të iqindisë, në xhaminë e Parrucës ka nisur këndimi i plotë i Kur’anit Famëlartë, Hatmeja Sherife, nën drejtimin e Myftiut dhe hafizëve të ardhur nga Turqia.           

Atmosfera e këtij muaji të begatë, ka nisur të ndjehet në Shkodër edhe nëpërmjet afisheve të shpërndara në hyrje të qytetit dhe në disa prej fshatrave kryesorë të tij, nëpërmjet të cilave, Myftinia Shkodër uron besimtarët dhe u kujton atyre agjërimin e këtij muaji të madhnueshëm.