Pasditën e së martës, më 26 korrik 2011, është organizuar për herë të parë në Shkodër aktiviteti ndërkombëtar i njohur si: “Sofra e Kur’anit”. Hafizë të Kur’anit nga Turqia, Gjermania dhe Maqedonia, kanë paraqitur para të pranishëmve të mbledhur në oborrin pranë xhamisë së Parrucës, një program të pasur me këndime kur’anore, ilahi dhe pjesë artistike të luajtuara me nej.
           
Në fjalën e tij përshëndetëse, Myftiu i Shkodrës ka theksuar se kjo është hera e parë që Myftinia Shkodër organizon një aktivitet të tillë në prag të Ramazanit. Ai ka falënderuar hafizët e nderuar, të cilët janë të njohur në mbarë botën për këndimet e tyre profesionale dhe zërin e ëmbël. Myftiu është lutur që kjo mbrëmje fetare, në shoqëri të shpirtit të Kur’anit, të bëhet një sihariq mbarësie dhe begatie për mbarë Shkodrën dhe qytetarët e saj.
           
Në këtë program kanë kënduar dhe interpretuar: Davut Kaya (përfaqësues i Dijanetit turk), Hafiz Osman Shahin (imam i xhamisë Fatih në Stamboll), 11 vjeçari Yunus Demirci (kënduesi më i mirë i Kur’anit në Evropë, 2010), Jusuf Yildiz (Gjermani), Abdullah Shaqiri (Kumanovë) dhe Osman Çelik (mjeshtër i nejit).
           
Gjatë kësaj mbrëmje fetare të këndshme, të pranishmit e ftuar, por edhe kalimtarët e shumtë që ndaleshin të tërhequr nga zërat e bukur, kanë pasur mundësinë të shijojnë këndimin e pjesëve kur’anore, ilahive të bukura në gjuhën shqipe dhe pjesët e luajtura në nej.            

Në përfundim të këtij aktiviteti, të pranishmit kanë falur sëbashku edhe namazin e akshamit, që është drejtuar nga imami i xhamisë Fatih të Stambollit, i cili ka fituar zemrat e besimtarëve shkodranë me zërin e ëmbël dhe melodioz.