Ditën e xhuma, më 22 korrik 2011, është organizuar falja e namazit të xhumasë, në sheshin pranë xhamisë së lagjes Zogaj. Shkak i kësaj iniciative ka qenë fakti se mbi pronën e Myftinisë Shkodër në Zogaj po ndërtohet në mënyrë ilegjitime një ndërtesë me disa kate. Ky veprim ka nxitur drejtuesit e Myftinisë Shkodër për të kërkuar prishjen e këtij objekti ilegjitim nëpërmjet shkresave dhe takimeve të shumta zyrtare. Realiteti i deritanishëm ka vërtetuar një humbje kohe me burokraci dhe shkresa pa fund, të cilat në të vërtetë i kanë dhënë kohë grabitësit të kësaj toke për të avancuar në ndërtimin e tij ilegjitim.
           
Në hytben e tij, Myftiu Imam Muhamed Sytari ka folur mbi shenjtërinë e pronës dhe dëmet e padrejtësisë në këtë jetë dhe në të ardhmen. Nëpërmjet ajeteve të shumta dhe haditheve profetike, Myftiu ka paralajmëruar se zullumi është shkak i përjashtimit të njeriut nga mëshira e All-llahut dhe bujaria e Tij.
           
Ai ka kritikuar të gjithë ata drejtues që kanë për detyrë të zbatojnë ligjet e këtij shteti, por që në mënyrë paradoksale janë bërë aleatë dhe përkrahës me grabitësin dhe zullumin e këtij ndërtimi ilegjitim.
           
Njëkohësisht ai ka dënuar edhe faktin se po përsëritet disa herë zaptimi i pronave të Myftinisë, si në Zdralej, në Zogaj etj, dhe valëvitja e flamujve partiakë mbi këto ndërtesa. Me këtë rast ai ka theksuar mirënjohjen dhe falënderimet për qeverinë shqiptare dhe kryeministrin Berisha, i cili e ka shenjtëruar pronën e komuniteteve fetare dhe ka lehtësuar procedurat për shfrytëzimin e tyre. Por, sipas Myftiut, njerëz të papërgjegjshëm, që fshihen pas flamujve partiakë po bëjnë zullume të panumërta, për të cilat do të japin një ditë llogari, në këtë botë, para të ardhmes!