Paraditën e së enjtes, më 7 korrik 2011, ka mbërritur për një vizitë në Myftininë Shkodër dijetari dhe studiuesi i shquar i fesë islame me banim në Aman të Jordanisë, Shejkh Shuajb Arnauti.
           
Me rastin e kësaj vizite, Myftiu i Shkodrës Imam Muhamed Sytari i ka uruar mirëseardhjen, duke e konsideruar këtë vizitë si një begati dhe mirësi për Myftininë dhe mbarë Shkodrën.
           
Gjatë takimit Hirësia e Tij ka pyetur për gjendjen e muslimanëve dhe ecurinë e Thirrjes Islame në Shkodër dhe Shqipëri. Ai ka kërkuar që muslimanët të kthehen nga historia e tyre e lavdishme dhe mos të harrojnë fenë dhe kulturën e saj. Hoxha i nderuar ka nxitur angazhim sa më të madh për të kapërcyer pasojat e sistemit ateist, që e zhveshi individin shqiptar nga besimi dhe feja islame.
           
Në këtë takim të përzemërt, Myftiu ka bërë një përshkrim të aktiviteteve dhe përhapjes së Thirrjes Islame në Shkodër. Njëkohësisht ai e ka falënderuar Shejkh Shuajb Arnautin për interesimin e tij të vazhdueshëm për Shkodërn dhe interesat e saj.            

Më pas, në shoqërinë e Myftiut, Shejkh Shuajb Arnauti ka vizituar edhe xhaminë e Parrucës, ku ka shprehur gëzimin e tij të madh për këtë vepër madhështore dhe është lutur për ndërtuesin e saj. Pas faljes së namazit të mesditës, Hirësia e Tij ka zhvilluar një mexhlis me besimtarët e pranishëm, ku ka dhënë disa këshilla të vlefshme për ruajtjen e fesë dhe krenarinë e të qenurit muslimanë.