Ditën e martë, më 28 qershor 2011, Myftinia Shkodër ka zhvilluar një tribunë fetare në përkujtim të mrekullisë së Israsë dhe të Miraxhit. Aktiviteti në fjalë është zhvilluar në xhaminë e Parrucës, menjëherë pas faljes me xhemat të namazit të akshamit.
           
Pasi janë lexuar ajetet e para të sures “El-Isra”, nga z. Ervin Metani, fjalën e ka marrë teologu Arben Halluni që ka bërë një prezantim të shpejtë të mrekullisë së natës së Israsë dhe të Miraxhit.

Ndërkohë, në fjalën e tij Myftiu Imam Muhamed Sytari ka shpjeguar se përse është e rëndësishme që herë pas here të organizohen tribuna të tilla, që mësojnë besimtarët dhe u kujtojnë atyre datat dhe ngjarjet e shënuara të fesë së tyre. Me këtë rast, ai ka vënë në dukje se mrekullia e Israsë dhe e Miraxhit, vazhdon të mbetet edhe sot një ftesë hyjnore për të besuar në një Zot të vetëm dhe në dërgesën profetike të Muhammedit (a.s).
           
Aktiviteti ka vijuar me temat e mbajtura nga teologët Admir Temja dhe Naim Drijaj, që kanë hedhur dritë mbi historinë e kësaj ngjarje dhe rëndësinë e namazit si një ndërvlerat kryesore të kësaj mrekullie.
           
Në këtë mbrëmje fetare, në xhaminë e Parrucës kanë prezantuar imamë, teologë, intelektualë e besimtarë të ndryshëm, të cilët kanë ndjekur me vëmendje argumentet e trajtuara në këtë aktivitet.
           
Më herët, pas namazit të iqindisë, në xhaminë e fshatit Bërdicë e Sipërme, Myftiu Imam Muhamed Sytari ka zhvilluar një bisedë fetare për motrat muslimane të këtij fshati, në lidhje me mrekullinë e Israsë dhe të Miraxhit.

Me këtë rast ai ka përgëzuar edhe imami n e kësaj xhamie, Bujar Ymeri për organizimin e xhematit dhe për grupin e fëmijëve të xhamisë, që kanë prezantuar edhe një program të këndshëm me ilahi dhe recitime fetare.Njëkohësisht, Myftiu ka drejtuar edhe namazin e parë në xhaminë e re të fshatit Bërdicë e Sipërme, që pritet të përfundojë brenda këtij viti.