Ditën e shtunë, më 18 qershor 2011, ka mbërritur në Shkodër për një vizitë dy ditore Myftiu i Gostivarit, Shaqir ef. Fetahu, me bashkëpunëtorë. Me rastin e kësaj vizite, ai ka zhvilluar takime me Myftiun e Shkodrës Imam Muhamed Sytari dhe drejtorin e Medresesë “Haxhi Sheh Shamia”, Kujtim Dervishi.
           
Gjatë vizitës së zhvilluar në Medresenë “Haxhi Sheh Shamia”, dega djem, Myftiu i Gostivarit ka parë prej afër ambientet e Medresesë dhe është njohur me një përshkrim të hollësishëm të arritjeve të deritanishme të saj. Këtu, ai ka shprehur kënaqësinë e tij për realitetin e kësaj medreseje dhe rezultatet e saj të larta.
           
Më pas vizita ka vijuar në Myftininë e Shkodrës, ku është zhvilluar një bisedë konstruktive mbi rolin e institucioneve islame në trojet shqiptare në ruajtjen e besimit dhe kultivimin e tij në shoqëri. Në këtë takim është folur edhe për rrugët e forcimit të bashkëpunimit dypalësh në fusha të ndryshme të aktivitetit fetar, shkencor e kulturor, në mes të dy institucioneve.

Myftinia e Gostivarit i është përgjigjur thirrjes së Myftinisë Shkodër me rastin e djegies së xhamisë fshatit Mes-Myeslim, ku në këtë vizitë është dorëzuar një ndihmë e konsiderueshme materiale për ndërtimin e xhamisë së re të këtij fshati.
           
Me rastin e kësaj vizite, Myftiu i Gostivarit i ka dorëzuar Myftiut të Shkodrës dhe drejtorit të Medresesë nga një “Mirënjohje”, për mikpritjen e nxënësve të Medresesë së Gostivarit, që vizituan Shkodrën para disa javësh. Njëkohësisht ai e ka ftuar Myftiun e Shkodrës për një vizitë zyrtare në Gostivar.
           
Mysafirët, të shoqëruar nga Myftiu, kanë falur namazin e akshamit në xhaminë e Parrucës, ku Shaqir ef. Fetahu ka mbajtur një ligjëratë të dobishme mbi vlerën e ruajtjes së besimit dhe përfitimit nga dija për përhapjen e tij. Njëkohësisht ai ka uruar besimtarët e pranishëm për xhaminë e re të Parrucës, në të cilën është falur për herë të parë.
           
Më pas mysafirët kanë bërë një vizitë në qytet, ku kanë parë nga afër pikat kryesore të Shkodrës, që e kanë vlerësuar për zhvillimin e shpejtë dhe ecurinë në 20 vitet e fundit.
           
Myftiu i Gostivarit ka dhënë edhe një intervistë për Tv1 Channel, ku pasi ka falënderuar mikpritjen, ka vlerësuar zhvillimin e dukshëm të qytetit të Shkodrës. Ai ka përmendur se nga hera e fundit që e ka vizituar qytetin tonë, para 18 viteve, ai ka pësuar ndryshime të dukshme, që e kanë bërë më të lulëzuar e më tërheqës. Ai ka dhënë një mesazh edhe për qytetarët e Shkodrës, që mos ta lënë besimin pas dore, të respektohen e të jetojnë në harmoni me njëri-tjetrin, megjithë dallimet e ndryshme që mund të ekzistojnë.