Ditën e xhuma, më 17 qershor 2011, besimtarët muslimanë të Shkodrës kanë pasur një arsye më shumë për të uruar njëri-tjetrin për mirësinë e madhe të dhuntisë së besimit, pasqyruar në rindërtimin e xhamisë së Parrucës në të njëjtin vend ku 40 vite më parë u shkatërrua nga sistemi ateist i shtetit.
           
Në hytben e mbajtur me këtë rast, Myftiu i Shkodrës Imam Muhamed Sytari ka vlerësuar se prej mirësive të Zotit që njeriu duhet t’i deklarojë me të madhe, është edhe ajo e besimit. Në rastin konkret ai është ndalur te xhamia e Parrucës, ku ka shprehur mirënjohjen e tij për sponsorizuesin e këtij objekti madhështor, z. Sait Jakup Fishta.
           
Në hytben e tij, Myftiu është ndalur në disa pika që kanë të bëjnë me harmoninë e muslimanëve me njëri-tjetrin dhe prezantimin e tyre në shoqëri. Myftiu ka kërkuar që të eliminohet zilia, xhelozia, fryma e përçarjes dhe dashakeqësisë së muslimanit për muslimanin. Ai ka bërë thirrje që të fuqizohet ndjenja e Vëllazërisë së Shenjtë Islame në mesin e besimtarëve.
           
Në këtë hytbe, Myftiu ka bërë thirrje që kjo fe dhe ky besim të dëshmohet pa frikë edhe në mjediset jashtë xhamisë. Ai ka kërkuar që muslimanët në Shkodër të jetojnë me krenari dhe të punojnë me krenari, pa pasur frikë paragjykimin e tundimet tjetërsuese që shpesh shfaqen aty-këtu. Ai ka sjellur në vëmendjen e të pranishëmve të shumtë edhe investimet që bëhen në Shkodër, ku ka shprehur gëzimin e tij për çdo lulëzim të qytetit. Por, ai ka kritikuar diferencimin në investime të zonave të ndryshme të Shkodrës, mbi disa të tjera, që është një fakt evident në vitet e fundit në Shkodër!
           
Në hytben e dytë, Myftiu ka shprehur një falënderim edhe për imamin e parë të xhamisë së Parrucës, teologun Alban Kali, Myftiun e parë që mbajti hytben e parë në këtë xhami të re, Imam Ndriçim Sulejmani, imamin aktual të xhamisë, muezinin e saj, si dhe për krejt teologët që kanë shërbyer në mënyra të ndryshme në këtë xhami të re.
           
Namazi i xhumasë së 200- të në xhaminë e Parrucës u drejtua nga Hafiz Ethem Haliti, nga Gostivari.