Ditën e enjte, më 2 qershor 2011, Myftiu i Shkodrës Imam Muhamed Sytari, ka zhvilluar një takim informues para drejtuesve më të lartë të Komunitetit Mysliman të Shqipërisë, në lidhje me çështjen e vakëfeve.

Në mbledhjen e organizuar, në prezencë të Kryetarit të KMSh, H. Selim Muça, nënkryetarit Gazmend Aga, kancelarit Ali Zaimi, drejtorit të Kulturës dhe Dialogut Ndërfetar Genti Kruja etj, Myftiu ka informuar për ecurinë e deritanishme në lidhje me vakëfin në Zogaj, në Zdralej, Dudas etj. Ai ka shpjeguar me hollësi për hapat e ndjekur deri tani në lidhje me këtë temë. Myftiu ka informuar se përtej përpjekjeve të deritanishme, në respektim të ligjeve të Republikës së Shqipërisë, ndërtimi ilegjitim në vakëfin e lagjes Zogaj vazhdon në mënyrë të habitshme, me ndërhyrje të njerëzve të ditur me pushtet në Shkodër. Ai ka kërkuar ndërhyrjen e Kryesisë së KMSh për këtë çështje dhe shumë të tjera që lidhen me vakëfin në Shkodër.
           
Kryetari i Komunitetit Mysliman të Shqipërisë, Haxhi Selim Muça ka shprehur indinjatën e tij në lidhje me uzurpimin e trojeve të shenjta vakëf në Shkodër dhe ka shprehur mbështetjen e tij për Myftininë Shkodër në përpjekjet për kthimin në identitet dhe shfrytëzimin e këtyre trojeve në shërbim të komunitetit besimtar.
           
Edhe nënkryetari i KMSh, Gazmend Aga, ka shprehur gatishmërinë për të bërë atë që është më e mira në rrugën e lirimit të vakëfeve dhe shfrytëzimit të tyre nga Myftinia Shkodër. Ai ka zhvilluar edhe një bisedë telefonike me Kryetarin e Bashkisë Shkodër, z. Lorenc Luka, ku ka kërkuar ndërhyrjen e tij në lidhje me vakëfet e uzurpuara në Shkodër.
           
Në përfundim të takimit, është rënë dakord që të zhvillohen edhe disa takime me zyrtarë të ndryshëm, si dhe të ndiqen të gjitha rrugët legjitime për mbrojtjen e vakëfeve dhe ruajtjen e qetësisë në mesin e besimtarëve të indinjuar për këto uzurpime të pronave të shenjta të muslimanëve në Shkodër.           

Në këtë takim Myftiu shoqërohej nga administratori i Myftinisë Shkodër, menaxheri i pronave dhe juristi i saj.