Paraditen e së martës, më 31 maj 2011, Myftiu Imam Muhamed Sytari ka inspektuar  vakëfin te xhamia e vjetër e Tabakut, ku ka parë prej afër pastrimin që i është bërë para pak ditësh gjurmëve të minares në vjetër të kësaj xhamie historike.

I shoqëruar edhe nga menaxheri i pronave të Myftinisë Shkodër, Blendi Alushi, Myftiu ka orientuar shfrytëzimin maksimal të këtij vakëfi, në shërbim të interesave të zhvillimit të kësaj zone. Myftiu ka parë nga afër edhe pjesën e mbetur të minares së vjetër dhe ka kërkuar që shumë shpejt të bëhet meremetimi i saj, rrethimi dhe kthimi i saj në një vend të vizitueshëm. Me këtë rast Myftiu ka theksuar se: “Nëse Monumetet e Kulturës e kanë neglizhuar këtë zonë me tradita dhe gjurmë të hershme islame dhe, vazhdojnë ta bëjnë këtë gjë, Myftinia Shkodër e ka për detyrë të ruajë dhe të mirëmenaxhojë vakëfet dhe trashëgiminë islame të qytetit!”
           
Më pas, Myftiu ka inspektuar edhe punën e bërë për pastrimin e territorit vakëf te xhamia e Ganjollës. Me këtë rast ai ka udhëzuar pastrimin e plotë të pronës, rrethimin e saj dhe angazhimin për shfrytëzimin e saj në mënyrën më të mirë dhe të dobishme.           

Inspektimet e pronave dhe vakëfeve, pastrimi i tyre nga uzurpimet e paligjshme, për të arritur shfrytëzimin dhe vënien në efiçencë të tyre, janë një ndër prioritetet më kryesore të Myftinisë Shkodër.