Ditën e shtunë, më 28 maj 2011, Këshilli i Myftinisë Shkodër, nën drejtimin e Myftiut Imam Muhamed Sytari, ka zhvilluar një vizitë në qytetin e Prizrenit, në Kosovë.
           
Në pritje të delegacionit nga Shkodra ka qenë Kryetari i Këshillit të Bashkësisë Islame të Prizrenit, Lutfi ef. Ballek me bashkëpunëtorë. Në mikpritjen e organizuar me rastin e kësaj vizite, ai i ka uruar mirëseardhjen në Prizren Myftiut të Shkodrës dhe anëtarëve të Këshillit të Myftinisë së tij. Kryetari i K.B.I të Prizrenit ka informuar vizitorët për historikun e përhapjes së fesë islame në këtë qytet, realitetin e Thirrjes Islame në këto ditë dhe sfidat për të ardhmen. Ai e ka konsideruar këtë vizitë si historike dhe shumë të domosdoshme, aq më shumë në këto ditë që rrugët e komunikimit kanë bërë që Shkodra dhe Prizreni të lidhen në pak orë.
           
Nga ana e tij, Imam Muhamed Sytari pasi ka falënderuar Myftiun e Prizrenit për mikpritjen, ka theksuar se kjo vizitë është një hap i rëndësishëm drejt forcimit të marrëdhënieve në mes të dy institucioneve. Myftiu ka vënë theksin te nevoja për shtimin e bashkëpunimit në mes të dy myftinive, në cilësi dhe formë.
           
Me rastin e kësaj vizite, ai i ka dhuruar homologut të tij një komplet me botimet kryesore që mbajnë firmën e tij, si dhe një komplet dhuratë për bibliotekën e Bashkësisë Islame të Prizrenit.
           
Më pas vizita ka vazhduar në disa nga stacionet më të rëndësishme fetare dhe kombëtare në qytetin e Prizrenit, si: Xhamia e Mehmet Pashës, biblioteka me dorëshkrimet e trashëgimisë islame, kompleksi i Lidhjes së Prizrenit, medreseja “Alaudin” – dega Prizren, disa nga xhamitë kryesore të qytetit, teqeja halvetiane etj.
           
Edhe në drekën e shtruar nga Lutfi ef. Ballek për nder të Myftiut të Shkodrës dhe Këshillit të Myftinisë së tij, është folur për rritjen e bashkëpunimit dhe harmonizimit të aktiviteteve të ndërsjellëta në mesin e dy myftinive.
           
Kjo ishte vizita e parë në Prizren e Këshillit të Myftinisë Shkodër.