Pasditen e së xhumasë, më 13 maj 2011, Myftinia Shkodër ka organizuar një takim me imamët e Shkodrës, për nder të vizitës së Myftiut të Iskenderunit Hamdi Kavillioğlu në qytetin tonë.
           
Në fjalën e tij përshëndetëse, Myftiu Imam Muhamed Sytari ka falënderuar Myftiun nga Turqia për këtë vizitë, që siç ka theksuar, do t’i shërbejë rritjes së bashkëpunimit dhe përkrahjes në mes të dy institucioneve.
           
Aktivitetin e ka përshëndetur edhe atashehu për çështjet fetare në Ambasadën Turke në Tiranë, z. Shaban Ishlek. Ai ka falënderuar praninë e imamëve dhe intelektualëve, duke theksuar se këto takime shërbejnë për t’u njohur me njëri-tjetrin dhe për të këmbyer eksperiencat pozitive reciproke.
           
Më pas, ky takim ka vijuar me këndimin e disa pjesëve kur’anore nga Hafiz Mustafa Çakar, pas të cilit në foltore është ftuar Myftiu Hamdi Kavillioğlu. Pasi ka falënderuar Myftiun e Shkodrës për ftesën dhe imamët për praninë e tyre, ai ka vënë në dukje se qënia prijës fetar na obligon me përgjegjësi të mëdha karshi Zotit dhe besimtarëve. Në këtë kontekst, ai ka përmendur shembullin e të dërguarit të All-llahut, Muhammedit (a.s), që ishte shembulltyra më e pastër dhe më origjinale në botë.
           
Myftiu ka kërkuar nga imamët që të punojnë me dashuri dhe respekt, për të ftuar njerëzit drejtë dritës së fesë dhe besimit islam.
           
Një pikë kulmore e këtij takimi ka qenë këndimi i disa ilahive nga hafizi turk, që është shoqëruar nga të gjithë të pranishmit në sallë. Në një atmosferë plot emocion e gjithë salla e konferencave në Grand Hotel ka kënduar himnin e ardhjes së profetit Muhammed (a.s) në Medine: “Taleal-bedru alejna” e të tjera ilahi.           

Në fund të aktivitetit të pranishmit janë takuar nga afër me miqtë nga Iskenderuni dhe kanë këmbyer urimet dhe përshëndetjet e rastit.