Ditën e xhuma, më 13 maj 2011, besimtarët frekuentues të xhamisë së Parrucës, kanë patur mundësi të marrin me vete emocione dhe mirësi të shumta nga falja e namazit të xhuma.
           
Me rastin e vizitës së Myftiut të Iskenderunit, Myftinia Shkodër ka organizuar një tryezë besimi, lutje dhe këshille fetare për të pranishmit në faljen e të xhumasë në xhaminë e Parrucës.
           
Aktiviteti ka nisur me këndimin e sures “El-Mulk” nga Hafiz Mustafa Çakar. Me zërin e tij të ëmbël e kumbues, ai ka bërë për vete zemrat e besimtarëve që kanë pasur çfarë të marrin nga ky këndim i veçantë.
           
Më pas Myftiu Imam Muhamed Sytari i ka dhënë fjalën z. Hamdi Kavillioğlu, Myfti i Iskenderunit, që ka mbajtur një këshillë fetare të vlefshme për besimtarët që kishin mbushur xhaminë e Parrucës. Ai ka hedhur dritë mbi cilësitë që e karakterizojnë besimtarin, sipas ajeteve kur’anore. Njëkohësisht ai ka shprehur gëzimin e tij për praninë në mesin e besimtarëve muslimanë në Shkodër dhe është lutur për begatinë dhe mirësinë e tyre në të dy jetët.
           
Ndërkohë, në hytben e xhumasë, Myftiu i Shkodrës ka dhënë shembuj nga dashuria e të parëve për të dërguarin e All-llahut. Ai ka theksuar se është e domosdoshme që fryma e kësaj dashurie të ndezë zemrat e besimtarëve sot në Shkodër dhe të kthehet në energji pozitive për jetën. Njëkohësisht, Myftiu ka ftuar të pranishmit që të luten për shpirtin e H. Faik Hoxhës, që është ndarë dje nga kjo jetë.            

Pas përfundimit të riteve të xhumasë, besimtarët janë përshëndetur me miqtë nga Turqia, duke i falënderuar për praninë, këshillat dhe emocionet e këndimit të Kur’anit që dhuruan në këtë ditë të madhe.