Të hënën, më 9 maj 2011, ka mbërritur në Shkodër për një vizitë dy ditore, dijetari dhe edukatori i shquar islam nga Turqia, Osman Nuri Topbash.
           
Gjatë kësaj vizite, Hirësia e Tij është ndalur fillimisht në medresenë e vajzave të Shkodrës, ku ka marrë pjesë në një aktivitet për nder të vizitës së tij. Aty, ai ka mbajtur një bisedë të dobishme për medresistet, ku ka dhënë këshillat e tij për zënien e dijeve, moralit islam dhe përhapjes së këtyre mësimeve edhe përtej shkollës.
           
Ndërkohë, pasditën e të hënës, autori i dhjetra librave me dobi në fusha të ndryshme të edukimit, moralit, historisë islame dhe civilizimit islam, Osman Nuri Topbash, ka zhvilluar një vizitë edhe në Myftininë Shkodër. Aty, ai është pritur nga Myftiu Imam Muhamed Sytari, që i ka uruar mirëseardhjen në Shkodër. Myftiu e ka konsideruar këtë vizitë si një bekim për Shkodrën dhe besimtarët e saj. “Vitin e kaluar, ju patët mirësinë të vizitonit Shkodrën dhe Myftininë e saj. Begatia e kësaj vizite reflektoi në mbarësinë e punës sonë. Jam i bindur se edhe kjo vizitë sjell me vete bekime dhe lutje mbarësie për Myftininë tonë dhe mbarë Shkodrën”- ka thënë Myftiu.
           
Nga ana e tij, dijetari Osman Nuri Topbash ka uruar mbarësi dhe sukses të vazhdueshëm për Myftininë Shkodër. Ai ka vlerësuar arritjet e deritanishme të Myftinisë dhe ka nxitur ruajtjen e ritmit të aktiviteteve dhe ecurisë së saj.
           
Me këtë rast, Myftiu i ka dhuruar dijetarit të shquar turk foton e xhamisë së Sulltan Mehmet Fatihut në kalanë Rozafa të Shkodrës. Ai ka theksuar se: “Sulltan Mehmet Fatihu është një emblemë e bekuar e dritësimit të Evropës me fenë e pastër Islame. Xhamia e tij në kalanë e Shkodrës është një gjurmë e bekuar e lidhjes së vulosur të shqiptarëve me Islamin dhe pasardhësit e Sulltanit të sihariquar nga Resulull-llahi (a.s)”.
           
Vizita e mikut të shtrenjtë nga Turqia ka vijuar me një aktivitet masiv në sallën e konferencave të medresesë së djemve, ku ka folur mbi vlerat e dhjetë ajeteve të para të sures “El-Mu’minunë”.
           
Dijetari Osman Nuri Topbash do të vijojë vizitën e tij në Shkodër edhe ditën e nesërme, ku do të vizitojë edhe medresenë e djemve, ku do të takohet me stafin pedagogjik të kësaj shkolle, pastaj do të udhëtojë drejt Kosovës, për të vijuar vizitën e tij atje.