Pasditen e së xhumasë, më 6 maj 2011, Myftinia Shkodër ka zhvilluar një ceremoni solemne me rastin e akordimit të titullit të lartë “Qytetar Nderi” për tre hoxhallarë të shquar të Shkodrës, H. Muhamed Bekteshi, Salih ef. Myftija dhe H. Esat Myftija.
           
Ceremonia ka nisur me një film rreth 15 minuta mbi jetën dhe veprën e këtyre hoxhallarëve të shquar, të cilët ia përkushtuan jetën e tyre mësimeve të fesë islame dhe vlerave kombëtare shqiptare.
           
Më pas, në fjalën e tij Myftiu Imam Muhamed Sytari ka vënë në dukje se jeta dhe vepra e këtyre burrave të shquar është një shembull që duhet ndjekur nga brezat. “Ata, jo vetëm që shërbyen për interesat e fesë, por dhanë një kontribut të dukshëm në mbrojtjen e vlerave tona kombëtare, që burojnë pikërisht përkushtimi i këtyre burrave dhe dashuria e tyre për besimin, dijen dhe përparimin e shoqërisë”- ka theksuar Myftiu.
           
Në fjalën e tij, ai ka kujtuar se nderimi i këtyre tre hoxhallarëve sot, është një detyrim më i madh për ta vazhduar rrugën e tyre, lartësimin e vendit të dijes, përkushtimit dhe ruajtjes së harmonisë në shoqëri. Njëkohësisht, Myftiu ka falënderuar Këshillin Bashkiak të Shkodrës për këtë titull të lartë të akorduar për këta hoxhallarë të nderuar.
           
Me shumë emocion, të pranishmit e shumtë që kishin tejmbushur sallën e konferencave në GHE, kanë ndjekur dorëzimin e titullit “Qytetar Nderi” për secilin prej hoxhallarëve të propozuar nga Myftinia Shkodër për këtë nderim. Trashëgimtarët e këtyre dijetarëve të nderuar kanë falënderuar Myftininë dhe Këshillin Bashkiak Shkodër për këtë vlerësim dhe nderim për baballarët e tyre.
           
Në fund të aktivitetit, të pranishmit i kanë kushtuar një “Fatiha” shpirtit të hoxhallarëve H. Muhamed Bekteshi, Salih ef. Myftija dhe H. Esat Myftija, që është lexuar nga nxënësi i tyre, H. Musa Hoxha.            Të pranishmit kanë patur mundësi të kalojnë edhe disa çaste të gëzueshme në shoqëri të njëri-tjetrit në një ftesë për kafe të organizuar me këtë rast.