Paraditen e së dielës, më 24 prill 2011, Myftiu Imam Muhamed Sytari ka zhvilluar vizitën tradicionale në dy kishat e qytetit, me rastin e festës së shënuar të Pashkëve për komunitetin ortodoks dhe atë katolik.
           
Në Famullinë Ortodokse, Myftiu i ka shprehur urimet më të përzemërta At Aleksandër Petanit dhe besimtarëve të pranishëm në kishë. Myftiu ka garantuar se fryma e harmonisë ndërfetare që ekziston në këtë qytet është një amanet i shtrenjtë që duhet ruajtur, kultivuar dhe përcjellur edhe te brezi i ri.
           
Edhe para mediave të pranishme, ai ka përsëritur urimet e sinqerta për komunitetin ortodoks dhe ka dhënë një mesazh të rëndësishëm për ruajtjen e harmonisë ndërfetare si simboli i dashurisë dhe mirësisë në tokë.
           
Ndërkohë, në Famullinë Katolike, ai i ka përcjellur mesazhin e paqes dhe harmonisë, Arqipeshkvit mons. Angjelo Massafra dhe besimtarëve të pranishëm. Në bisedën e përzemërt, pasi ka bërë urimin e festës, Myftiu ka theksuar se është mirësi e madhe që këto ditë të shënuara na bëjnë të jemi më pranë njëri-tjetrit dhe të përcjellim kudo mesazhin e harmonisë dhe vlera besimore.           

Edhe para mediave të pranishme Myftiu është lutur për harmoninë në komunitet dhe vlerat e mrekullueshme të bashkëjetesës ndërfetare në vendin tonë.