Pasditen e së enjtes, më 21 prill 2011, në sallën e konferencave pranë Medresesë së djemve, Myftinia Shkodër ka zhvilluar një ceremoni solemne me rastin e nderimit të 10 imamëve të vitit 2010.
           
Aktiviteti që ka nisur me këndimin e një pjese kur’anore, është përshëndetur nga Myftiu Imam Muhamed Sytari. Në fjalën e tij, ndër të tjera ai ka përmendur se: “Kam gjykuar se nderimi i përvitshëm i imamëve, është vlerësim për punën e vetë Myftinisë, besim në kohën tonë, mesazh jete për ecurinë e mëtejshme të kësaj Thirrje Islame të dritshme në këtë tokë! Ky vit, në drejtim të Myftinisë Shkodër, ishte më i gjati i jetës sime. Gjatë tij, kam pasur mundësi të lëviz në çdo cep të saj. Javë pas jave, hytbe pas hytbeje, takim pas takimi, kam parë me sytë mi dhe kam prekur prej afër realitetet e pathëna të Myftinisë Shkodër, të lëvizjes islame, të Thirrjes, të prezencës së besimit në jetën e përditshme të njerëzve. Pa dyshim, kam mbajtur shënime, kam analizuar, jam këshilluar e kam ndërhyrë, aty ku e kam gjykuar të drejtë ta bëj një gjë të tillë. Shumë gjëra nuk janë realizuar nga kokëfortësia e realiteteve! Por, mbi të gjitha këto e, përtej hijeve, kam ndjerë nga afër dritën e mbarësisë hyjnore, mbrojtjen dhe garancinë e ecjes përpara, larg tundimeve dhe frikës! Dhe kjo më ka mjaftuar për të mos e ulur kokën dhe për të mos u dorëzuar!”

Më pas, Myftiu ka falënderuar imamët dhe ka shprehur mirënjohjen e tij ndaj tyre. Ai ka thënë: “Në gjithë këtë ecuri 364 ditore në drejtimin tim të Myftinisë Shkodër, mendoj se është momenti të vlerësoj dhe të nderoj përpara jush mundin dhe përkushtimin e imamëve të 52 xhamive funksionale në rrethin tonë. Ata janë fytyra e vërtetë e Myftinisë Shkodër! Ata janë njerëzit që meritojnë më të madhin respekt, vlerësimin më të denjë, mirënjohjen. Pa prezencën e tyre, pa sakrificën e dëshmuar, pa sinqeritetin e tyre ndaj Zotit dhe Thirrjes Islame, nuk do ishim ku jemi e, nuk mund të arrijmë, ku aspirojmë! Prandaj, me përulje ndaj imamëve tanë të nderuar shpreh mirënjohjen time të thellë për punën e secilit, për korrektësinë dhe seriozitetin, për dashurinë e madhe me të cilën kanë kontribuar dhe vazhdojnë, duke shpresuar shpërblimin dhe pëlqimin e All-llahut të Madhëruar!”.

Më pas, ka referuar Myftiu i Malësisë së Madhe, H. Edmir Smajlaj, që ka zbardhur argumente dhe fakte mbi rolin e imamit në xhami dhe përtej saj. Ai ka falënderuar këtë organizim dhe ka dhënë disa këshilla të vlefshme për imamët, prijësit fetarë dhe thirrësit islamë.

Me shumë emocion, të pranishmit kanë përjetuar shpërndarjen e çertifikatave të mirënjohjes për dhjetë imamët e përzgjedhur për vitin 2010. Nga ana e tyre, me shumë emocion, imamët kanë falënderuar Myftininë Shkodër për këtë vlerësim dhe nderim, sikurse kanë shprehur mirënjohjen e tyre për xhematet përkatëse dhe harmoninë në mes tyre.

Aktiviteti është mbyllur me fjalën e teologut Arben Halluni, që ka folur mbi rëndësinë e drejtimit fetar, si dhe përgjegjësitë e mëdha që ka imami, si drejtues i xhematit dhe mësues i udhëzimeve fetare.

Imamët e vitit 2010:

1. Adem Pizga – Xhamia Perash.
2. Agim Hoxha – Xhamia Boks.
3. Edvin Çela – Xhamia Golem.
4. Fejzi Zaganjori – Xhamia Rus.
5. Idmir Plaku – Xhamia “Ebu Bekër”.
6. Jetmir Braqi – Xhamia Trush.
7. Kujtim Cufaj – Xhamia Kullaj.
8. Naim Drijaj – Xhamia Parrucë.
9. Shkëlqim Sykaj – Xhamia Dragoç.
10. Shukri Kapllan – Xhamia Bushat.