Paraditen e së mërkurës, më 13 prill 2011, është organizuar një aktivitet fetar në përkujtim të lindjes së profetit Muhammed (a.s), në fshatin Trush. Oborri i xhamisë ishte i mbushur me qindra besimtarë të moshave të ndryshme, të cilët kishin ardhur për të marrë pjesë në këtë festë të madhe popullore për banorët e këtij fshati.
           
Fjalën e hapjes e ka mbajtur imami i kësaj xhamie, teologu Jetmir Bracej, i cili ka vlerësuar pjesëmarrjen e madhe të banorëve të këtij fshati në këtë ceremoni fetare me rastin e përkujtimit të jetës dhe mesazheve hyjnore me të cilat u dërgua hz. Muhammedi (a.s). Ai ka nxitur dashurinë për të dërguarin e All-llahut dhe pasimin e traditave të tij në jetë.
           
Ndërkohë, në fjalën e tij, Myftiu Imam Muhamed Sytari, pasi ka vlerësuar traditën e mirë të muslimanëve të kësaj zone për ta mbajtur të gjallë përkujtimin e hazreti Muhammedit (a.s), ka dhënë disa shembuj të dashurisë së sahabëve për të dërguarin e All-llahut. Në fjalën e tij, Myftiu i është referuar muezinit të profetit, Bilalit (r.a) dhe dashurisë së madhe që ai kishte për profetin. Myftiu ka kërkuar që kjo frymë dashurie të mbahet e gjallë në zemër dhe të mëkohet te çdo fëmijë dhe i ri. Njëkohësisht ai është lutur, sëbashku me të pranishmit që dëshmonin dashurinë e tyre për profetin: “O Zot dëshmo se ne e duam Resulull-llahin! O Zot ruaje të paprekur këtë dashuri, brez pas brezi, në këtë vend e në bijtë tanë! O Zot na tubo në ditën e gjykimit, siç jemi tubuar sot, me të dërguarin Tënd të dashur!”
           
Aktiviteti ka vijuar me këndimin e disa pjesëve nga mevludi, ilahi të përzgjedhura dhe salavate me xhemat. Në përfundim të aktivitetit, të pranishmit kanë falur sëbashku edhe namazin e mesditës dhe janë përshëndetur me rastin e kësaj feste të madhe popullore.