Paraditen e së hënës, më 11 prill 2011, Myftiu Imam Muhamed Sytari ka bërë një vizitë zyrtare në Qendrën “Progresi”, ku është pritur nga drejtori i saj, teologu Artur Tagani.
           
Me këtë rast Myftiu ka uruar drejtorin e ri të “Progresit” për detyrën dhe është lutur për mbarësinë e tij në drejtim të kësaj qendre islame që po jep ditë pas dite kontributin e saj në rritjen dhe kultivimin e vlerave islame në Shkodër.
           
Ndërkohë, drejtori i “Progresit”, ka falënderuar Myftiun për vizitën dhe ka shprehur gëzimin e tij për këtë takim zyrtar në këtë kohë. Ai ka vlerësuar rolin e Myftinisë Shkodër në organizimin dhe drejtimin e Thirrjes Islame, duke e konsideruar edhe kontributin e kësaj qendre islame si pjesë të pandarë të Myftinisë Shkodër.
           
Gjatë këtij takimi, Myftiu ka shfrytëzuar rastin për të uruar edhe stafin e revistës “Etika”, për pesë vjetorin e botimit të parë të saj. Myftiu ka theksuar se “Etika”, po bëhet dita-ditës një botim elitar, plot vlera e dobi, që rrezatojnë gjurmë të pastra të kulturës dhe qytetërimit islam në Shkodër dhe në krejt trojet shqiptare. Me këtë rast, ai i ka dorëzuar kryeredaktorit dhe drejtorit të kësaj reviste, z. Alban Kali, një mesazh urimi me rastin e 5- vjetorit të daljes së saj dhe ka uruar mbarësi të mëtejshme për krejt ata që punojnë për lartësimin e vlerave islame në këtë qendër.
           
Në këtë vizitë, Myftiu shoqërohej nga përgjegjësi i kulturës dhe arsimit në Myftininë Shkodër, teologu Arben Halluni.