Ditën e xhuma, më 8 prill 2011, nga minberi i xhamisë së Plumbit, Myftiu Imam Muhamed Sytari ka bërë thirrje që të mos humbet shpresa dhe optimizmi në mbarësinë dhe mbështetjen e All-llahut. Në fjalën e tij të mbajtur para besimtarëve të pranishëm, Myftiu ka theksuar se është detyrim i muslimanëve sot, të mos lënë pas dore amanetin e baballarëve dhe të interesohen me sa të kenë mundësi për  vakëfet e tyre, si një burim force dhe një garanci për Thirrjen Islame.
           
Në hytben e tij, Myftiu ka thënë: “Si do të ishte Thirrja Islame në Mekkë dhe jashtë saj, po të mos ishte Ebu Bekri (r.a) që jepte krejt pasurinë e tij, Omeri (r.a) që jepte gjysmën e pasurisë, Osmani (r.a) që përgatiste një ushtri të tërë për një betejë, nëna e jonë Hatixhe, që dha krejt pasurinë e saj, e shumë sahabë të tjerë që ndihmuan dhe përkrahën Thirrjen Islame me pasuri e ndihma konkrete. Prandaj, kur flasim për vakëfet dhe ngremë zërin për to, është se fillimisht është një e drejtë e jona legjitime, pastaj një burim force dhe përkrahje për imamët, xhamitë, vetë Thirrjen Islame në Shkodër. Nuk duhet të kemi frikë asgjë në rrugën e përkrahjes së fesë sonë! Nuk duhet të stepemi në rrugën e kthimit të vakëfeve tona në identitet, sipas rregullave dhe ligjeve në fuqi të vendit tonë!”
           
Nga minberi i xhamisë së Plumbit, Myftiu ka uruar besimtarët muslimanë për pastrimin e plotë të vakëfit të kësaj xhamie dhe është lutur për banorët e kësaj zone dhe mirëqenien e xhamisë së Plumbit.