Paraditen e së xhumasë, më 8 prill 2011, Inspektorati i Ndërtimit pranë Bashkisë Shkodër, ka nisur një aksion për prishjen e nëntë njësive tregtare mbi pronën e vakëfit të Myftinisë Shkodër. Ky aksion vjen pas verifikimit të dokumentacionit përkatës, në rrugën që Myftinia Shkodër ka ndërmarrë për kthimin në identitet të pronave të saj vakëf. Kishte kohë që mbi këtë truall të Myftinisë zhvillohej tregti e palicencuar, prej së cilës ka përfituar padrejtësisht një person që ka zaptuar këtë truall me një ndërtim banimi, ende në këmbë.
           
Pas deklaratës së bërë nga Myftiu Imam Muhamed Sytari, më 16 mars 2011, takimeve të shumta zyrtare, emisioneve televizive dhe intervistave në media të ndryshme lokale dhe kombëtare, vjen kjo ndërhyrje për pastrimin e pjesshëm të këtij vakëfi.
           
Pavarësisht këtij aksioni që meriton mirënjohje dhe falënderim, Myftinia Shkodër mbetet në pritje të lirimit të plotë të vakëfit të saj në këtë zonë.            

Me këtë rast, Myftinia Shkodër fton besimtarët të luten për vakëfet dhe lirimin e tyre nga njerëz të papërgjegjshëm dhe nga përpjekje primitive për tjetërsimin e tokave të shenjta të muslimanëve të Shkodrës.