Pas licencimit të Universitetit të Komunitetit Mysliman të Shqipërisë, me vendim të Këshillit të Ministrave, dt. 6 Prill 2011, është inauguruar një ditë më pas dhe pikërisht sot, Universiteti BEDËR, duke bërë më në fund realitet një nga ëndrrat e kahershme të myslimanëve shqiptarë.
 
Në këtë ditë të feste nderonin me pjesëmarrjen e tyre Kryeministri i Shqipërisë, z. Sali Berisha, anëtarë të kabinetit qeveritar, përfaqësues të komuniteteve fetare, të trupit diplomatik, drejtues të institucioneve shtetërore dhe organizatave joqeveritare. Merrnin pjesë po ashtu personalitete të shquara nga trevat shqiptare, të cilat kishin ardhur për të uruar dhe marrë pjesë në gëzimin e kësaj dite historike për Islamin dhe myslimanët në Shqipëri.

Të pranishmit i ka përshëndetur rektori i Universitetit BEDËR, Dr. Ferdinand Gjana. Duke falënderuar të gjithë ata që kontribuuan për ngritjen e kësaj vatre të re dijeje dhe edukimi, z. Gjana u shpreh se ky universitet do të shërbejë për arsimimin dhe edukimin e brezave të rinj në përputhje me parimet dhe vlerat universale islame.

Z. Gjana ka ftuar kryetarin e Komunitetit Mysliman të Shqipërisë, H. Selim Muça për të bërë përshëndetjen e rastit. Në fjalën e tij z. Muça ka vlerësuar përpjekjet që janë bërë në këtë drejtim dhe që u kurorëzuan me hapjen e kësaj fidanishteje të re islame. Ai vlerësoi si tepër të rëndësishme mbështetjen dhe ndihmën e pakursyer të shtetit shqiptar. Sipas tij, ky institucion do të shërbejë jo vetëm për edukimin dhe arsimin e gjeneratave të reja, por edhe për konsolidimin e harmonisë ndërfetare, që ka qenë dhe mbetet një nga vlerat e rralla të shoqërisë shqiptare.

Kryetari Muça ka ftuar më pas Kryeministrin Sali Berisha për të përcjellë mesazhin e tij. Në fillim të fjalës së tij z. Berisha falënderoi kreun e KMSH-së, Haxhi Selim Muça për kontributin e tij në drejtim të institucionit më të madh fetar në vend. Duke e konsideruar hapjen e këtij universiteti si një kontribut të madh për vendin, z. Berisha tha se kjo shkollë është një zhvillim i rëndësishëm në formimin, edukimin dhe promovimin e mësimeve të Kur’anit. Ai u shpreh me nota pozitive për bashkëjetesën e paqtë mes besimeve në Shqipëri, duke e konsideruar këtë gjë si një pasuri të madhe për një komb të vogël si Shqipëria.

“Shqiptarët janë një komb me liri të plotë besimi, por nga ana tjetër respektojnë plotësisht besimet e njëri-tjetrit. Jam i bindur se ky universitet do të japë një kontribut të madh në konsolidimin gjithnjë e më të madh të këtij virtyti të arrirë që kanë shqiptarët dhe kombi ynë në veçanti”, tha z. Berisha, ndërsa shprehu bindjen se te mirëkuptimi, bashkëpunimi dhe toleranca ndërfetare qëndron forca e besimit te Zoti.

“Ky mesazh njerëzor dhe hyjnor u ripërtëri pas një kalvari të egër dhe po rezonon gjithnjë e më shumë në Evropë dhe botë. Për 45 vite me radhë ky komb ishte arenë e përballjes midis besimit tek Zoti dhe rrugës tjetër, që donte me çdo kusht t’i bindte shqiptarët se ajo ishte rruga e vetme. Por ai sistem dështoi, ndërsa ju u ngritët dhe ja tek jeni sot për të përfaqësuar vlerat më të mira të besimit dhe kulturës shqiptare”, mbylli mesazhin e tij Kryeministri i Shqipërisë.

Më tej, Kryetari Muça dhe Kryeministri Berisha kanë prerë shiritin e inaugurimit, duke i hapur kështu rrugën këtij institucioni të rëndësishëm të arsimit islam dhe atij kombëtar.  Ata kanë vizituar më pas ambientet e brendshme të godinës së universitetit, teksa kanë takuar dhe janë përshëndetur me shumë të rinj që kanë shfaqur dëshirën për të ndjekur studimet e larta pranë këtij institucioni të ri arsimor.

Universiteti BEDËR do të ofrojë programe studimore të ciklit të parë në dy fakultete me gjashtë departamente. Në Fakultetin e Shkencave Humane do të ofrohen programet e studimit në Departamentin e Shkencave Islame, Departamentin e Shkencave Juridike dhe Departamentin e Shkencave të Komunikimit. Ky fakultet do të përmbajë gjithashtu edhe një qendër kërkimore “Për Dialogun Ndërfetar dhe Ndërkulturor”. Fakulteti i Filologjisë dhe Edukimit do të ofrojë tre mundësi të tjera studimi në Departamentin e Gjuhës dhe Letërsisë Angleze, Departamentin e Gjuhës dhe Letërsisë Arabe dhe Departamentin e Gjuhës dhe Letërsisë Turke. Ndërkohë, në këtë fakultet do të jetë aktive edhe Qendra kërkimore-zhvillimore “Për Gjuhën dhe Letërsinë Shqipe”.

Mësimdhënia në Universitetin BEDËR do të zhvillohet në gjuhët shqipe, arabe dhe turke, ndërkohë që edhe gjuha angleze do të jepet në mënyrë intensive  si lëndë e gjuhës së huaj gjatë gjithë kohëzgjatjes së studimeve.

Ky institucion arsimor synon përshtatjen me konceptin akademik të parimeve themelore islame dhe njerëzore, duke vlerësuar traditën mbarëshqiptare dhe vlerat universale. Përgatitja e specialistëve të lartë, në përputhje me kërkesat dhe nevojat e shoqërisë në ndryshim dhe zhvillim si dhe ndërmarrja e studimeve dhe punës kërkimore për çështje sociale që shqetësojnë myslimanët shqiptarë dhe shqiptarët në tërësi në hapësirën ku jetojmë është një tjetër synim i rëndësishëm i Universitetit BEDËR.

Si një institucion i standardeve ndërkombëtare, Universiteti BEDËR synon tërheqjen dhe arsimimin e të rinjve jo vetëm nga Shqipëria dhe hapësira mbarëshqiptare, por edhe nga vendet e tjera të rajonit dhe Evropa.