Paraditen e së mërkurës, më 6 prill 2011, ka nisur puna për hapjen e themeleve për përfundimin e rrethimit të zonës vakëf në territorin e xhamisë së Plumbit.
           
Këto punime, vijnë si rezultat i kërkesave dhe përpjekjeve të përsëritura të Myftinisë Shkodër për të arritur në këtë pikë, ku është hapur përfundimisht rruga për rrethimin e plotë dhe rehabilitimin e kësaj zone të begatë, në mesin e së cilës ndodhet xhamia e Plumbit, monument kulture.
           
I pranishëm në këtë ndërhyrje të mirëpritur për Myftininë Shkodër dhe besimtarët e saj, Myftiu Imam Muhamed Sytari, ka përgëzuar iniciativën pozitive të Bashkisë Shkodër për të bërë detyrën e saj në lidhje me lirimin e një pjese të zënë të këtij territori me një ndërtim të paligjshëm.

Në një komunikim publik me mediat e pranishme, Myftiu ka shpjeguar rëndësinë e kësaj ndërhyrje në këtë zonë. Ai ka falënderuar Bashkinë Shkodër dhe kryetarin e saj në veçanti, për ndërhyrjen e duhur dhe përgjigjen e kërkesave të shumta të Myftinisë, që kulmuan me deklaratën publike të Myftiut me 16 mars 2011. Ai ka theksuar se Myftinia Shkodër do të vazhdojë përpjekjet e saj për ta ndryshuar realitetin e kësaj zone, me një vakëf shumë të madh e të shfrytëzueshëm.
           
Me këtë rast, Myftinia Shkodër fton besimtarët muslimanë, brenda vendit dhe jashtë tij, të vazhdojnë të kontribuojnë për vazhdimin e rehabilitimit të plotë të kësaj zone vakëf.