Në emër të Komunitetit Mysliman të Shqipërisë dhe në emrin tim personal, shpreh dhimbjen e thellë për humbjen e jetës së Kryegjyshit Botëror të Bektashianëve Haxhi Dede Reshat Bardhi. Në këtë ditë të trishtuar ndajmë dhimbjen e familjarëve, Kryegjyshatës Bektashiane dhe të gjithë besimtarëve brenda dhe jashtë vendit.

Siç shprehej edhe vetë Haxhi Dede Reshat Bardhi, “si vëllezër të një besimi”, ne bashkohemi në këtë ditë të trishtueshme me dhimbje të madhe për humbjen e njeriut tonë dhe patriotit të denjë.

Në emër të mbarë besimtarëve myslimanë shqiptarë, shpreh edhe një herë ngushëllimet më të thella dhe të sinqerta, duke ndarë këto çaste të vështira për këtë humbje shumë të madhe të një udhëheqësi, jo vetëm për Komunitetin Bektashian, por për mbarë vendin.

Për besimtarët vdekja nuk është fund, por vetëm një shtegtim nga kjo botë me sprova dhe vështirësi, në botën e amshueshme, ku të gjithë besimtarët e devotshëm, njerëz të dashur të Zotit shpërblehen me xhenet.

I lutemi Allahut Mëshirëplotë, që ta mëshirojë dhe ta bëjë prej banorëve të xhenetit.