Pasditen e së mërkurës, më 30 mars 2011, është zhvilluar mbledhja e radhës e Këshillit të Myftinisë Shkodër, ku është diskutuar gjerësisht mbi çështjen e vakëfeve të kësaj Myftinie.
           
Në fjalën e tij para anëtarëve të këshillit, Myftiu ka shpjeguar të gjitha hapat që po ndjek Myftinia Shkodër për të bërë të mundur kthimin në identitet të shumë vakëfeve, që janë të rëndësishme dhe jetike për muslimanët e Shkodrës.
           
Myftiu ka bërë një ekspoze të etapave dhe hapave të ndjekur për të arritur deri në këtë pikë, ku opinioni i gjerë është sensibilizuar në një nivel të admirueshëm në lidhje me këtë çështje të rëndësishme.
           
Myftiu ka theksuar se kjo është një betejë e vështirë, ku secili duhet të bëjë më të mirën për të çuar në vend amanetin e të parëve dhe për të mos toleruar batërdinë që burokracitë e 21 viteve të fundit kanë bërë me vakëfet e Shkodrës. Ai ka kritikuar edhe ata që në një mënyrë a një tjetër janë përpjekur të stopojnë këtë lëvizje të Myftinisë, duke e konsideruar atë si një shfaqje e rëndomtë e një miratimi të kësaj situate aspak të pranueshme. Njëkohësisht ai ka falënderuar mbështetjen e madhe qytetare dhe besimtare në këtë përpjekje për të risjellë para vëmendjes publike “zullumin me vakëfet e Shkodrës”.
           
Në këtë mbledhje, një relacion të shkoqitur ka mbajtur edhe juristi i Myftinisë Shkodër, z. Bashkim Muslija, që ka paraqitur ecurinë e proceseve gjyqësore dhe zhvillimeve më të reja në lidhje me pronat e shumta të Myftinisë.
           
Gjatë mbledhjes, anëtarët kanë kërkuar që këto përpjekje të mos ndalen dhe të intensifikohen për të arritur qëllimet e kërkuara. Ata, njëkohësisht kanë përcjellë mbështetjen e opinionit të gjerë në Shkodër në lidhje me deklaratën e Myftiut dhe lëvizjet e ditëve të fundit në lidhje me këtë çështje.           

Në këtë pikë, Myftiu ka theksuar: “Gjatë takimit të sotëm me kryetarin e Bashkisë (gjatë vizitës së delegacionit nga Kuvajti), kam marrë premtimin e tij për realizimin e kërkesave të bëra nga institucioni ynë, deri me datën 8 prill 2011. Ne po presim realizimin e këtij premtimi, pastaj do të shprehemi sërish në lidhje me këtë çështje. Ndërkohë, ju siguroj se Myftinia Shkodër po bën maksimalen për të arritur qëllimet e saj në lidhje me vakëfet, nëpërmjet takimeve zyrtare, shkresave dhe ndërhyrjeve legjitime në vendin dhe kohën e duhur!”.