Ditën e dielë, më 27 mars 2011, nëpërmjet ekranit të Tv1 Channel, është transmetuar një speciale në lidhje me çështjen e vakëfeve, për të cilat është ankuar ditët e fundit Myftinia Shkodër.
           
Për rreth një orë, Myftiu Imam Muhamed Sytari, At Nikolla Petani dhe avokati i Myftinisë Shkodër, z. Bashkim Muslija, i janë përgjigjur pyetjeve të gazetares Arjana Qatipi, në lidhje me një shqetësim të krijuar si rezultat i një neglizhence të theksuar me pronat e Myftinisë dhe Famullisë Ortodokse në Shkodër.
           
Gjatë këtij emisioni, qytetarët kanë patur mundësi të ndjekin nga afër shqetësimet konkrete të dy komuniteteve fetare të dëmtuara në çështjen e kthim-kompensimit të pronave të tyre. Nëpërmjet fakteve konkrete dhe dokumenteve shoqëruese, avokati i Myftinisë shkodër ka argumentuar shqetësimin konkret të institucionit të muslimanëve të veriut.
           
Në këtë emision, Myftiu i Shkodrës, ka bërë një apel të hapur për krejt pushtetarët e vendit tonë që të jenë të vëmendshëm me komunitetet fetare dhe mos t’i trajtojnë ata me diferencime, që sipas Myftiut, janë të dëmshme për shpirtin e bashkëjetesës dhe harmonisë ndërfetare në Shkodër e përtej saj. Ai ka theksuar se të gjitha komunitetet fetare dhe besimtarët e tyre janë persekutuar nga sistemi ateist, duke i zhveshur edhe nga pronësia mbi shumë vakëfe të shenjta.

Myftiu ka përmendur edhe faktin se gjatë viteve të fundit, në Shkodër po shfaqet një tendencë e papranueshme ndaj besimtarëve muslimanë, që në asnjë mënyrë nuk duhet toleruar e lënë në realitetin aktual. Në këtë pikë, Myftiu ka përmendur edhe mosaprovimin e Drejtorisë së Arsimit Shkodër për emërimin e një mësueseje të mbuluar me hixhab në një shkollë fshati etj.