Pasditen e së enjtes, më 24 mars 2011, Myftiu Imam Muhamed Sytari dhe Famullitari i Kishës Ortodokse At Nikolla Petani, kanë zhvilluar një takim pune në zyrën e Prefektit të Shkodrës, z. Maxhid Cungu.
           
Qëllimi i këtij takimi kanë qenë shqetësimet e ditëve të fundit të Myftinisë Shkodër dhe Kishës Ortodokse në lidhje me çështjen e pronave të këtyre dy komuniteteve.
           
Nga ana e tij, Imam Muhamed Sytari ka kërkuar nga prefekti Cungu që si përfaqësues i qeverisë shqiptare të nxisë zbatimin e ligjit në favor të pronave vakëf të Myftinisë Shkodër. Myftiu ka përsëritur faktin se vitet dhe dekadat po kalojnë dhe fati i disa pronave të Myftinisë Shkodër po ngelet peng i burokracive të disa pushtetarëve të vegjël të këtij vendi. Myftiu ka theksuar se Myftinia Shkodër është e vendosur për të mos heshtur ndaj zullumeve të akumuluara prej shumë vitesh në lidhje me këtë çështje. Ai e ka përfunduar fjalën e tij duke përmendur se ata që kanë udhëzuar heshtjen përballë deklaratave të Myftinisë Shkodër, janë treguar jo largpamës!
           
Edhe At Nikolla Petani ka kërkuar nga ana e tij që Kishës Ortodokse t’i kthehen të drejtat e saj legjitime në një mori pronash legjitime, që kanë mbetur akoma peng e premtimeve të parealizuara. Ai ka përmendur disa prej pikave më të rëndësishme që shqetësojnë sot komunitetin e tij, që akoma nuk ka marrë asgjë nga pronat që i takojnë në Shkodër.
           
Ndërkohë Prefekti i Shkodrës, ka garantuar se do të bëjë më të mirën për të kërkuar atë që është edhe prioritet i qeverisë shqiptare, vëmendja dhe përkujdesja për shqetësimet e komuniteteve fetare në Shqipëri.