Paraditen e së mërkurës, më 23 mars 2011, Myftiu Imam Muhamed Sytari ka pritur z. Nexhat Guzi dhe z. Artan Kosti, përfaqësues të Komitetit Shtetëror të Kulteve. Në bisedën e tyre është folur për rolin e Myftinisë Shkodër si promotor dhe nxitës i dialogut ndërfetar, harmonisë dhe frymës së bashkëjetesës në vend.
           
Myftiu ka vënë në dukje se Myftinia Shkodër ka një rol vendimtar në raportet e bashkëjetesës, por ka theksuar se kjo shfaqje shoqërore ka nevojë për sinqeritetin e palëve dhe përkushtimin ndaj saj. Ai ka theksuar se Myftinia Shkodër do të vazhdojë të jetë misionare e sinqertë e mësimeve të Kur’anit dhe e traditës së Muhammedit (a.s).
           
Gjatë këtij takimi është folur edhe për deklaratat e ditëve të fundit të Myftiut të Shkodrës. Nga ana e tij, Imam Muhamed Sytari ka kërkuar që pushtetarët burokratë të zgjohen nga gjumi i zullumit dhe të bëjnë punën e tyre për të zbatuar prioritetet që kryeministri i këtij vendi ka deklaruar për komunitetet fetare. Ai ka thënë së këto deklarata nuk kanë të bëjnë me votimet e 8 majit, por janë përpjekje zinxhir për zgjidhjen e problemit të pronave.
           
Myftiu ka kërkuar ndërhyrjen e shpejtë dhe të menjëhershme të Bashkisë Shkodër për pastrimin e pronës vakëf në Zdralej, në Zogaj, te Xhamia e Plumbit etj.
           
Nëpërmjet hartave dhe fotografimeve satelitore, Myftiu u ka treguar përfaqësuesve të K.Sh.K- së, problemin e pronës vakëf te Xhamia e Plumbit dhe ka kërkuar ndërhyrjen e përfaqësuesve të shtetit për t’i kthyer Myftinisë Shkodër të drejtën e saj legjitime.