Pasdreken e së mërkurës, më 23 mars 2011, Myftiu i Shkodrës ka pritur në një takim të përzemërt koordinatorin për Ballkanin të Fondacionit Bamirës “Islamic Relief”, me qendër në Birmingham të Mbretërisë së Bashkuar, z. Ismail Tahmazov.
           
Gjatë takimit, Myftiu e ka falënderuar përfaqësuesin e lartë të I.R., duke shprehur mirënjohjen e tij të thellë për kontributet e vyera që ky fondacion bamirës ka dhënë në Shkodër. “Nuk ka dyshim që “Islamic Relief” është bërë një pjesë nderi e qytetit tonë. Kontributet që ju keni dhënë për Shkodrën janë të shumta. Ju mjafton krenari dhe nder, ajo që keni bërë për Medresenë e djemve “Haxhi Sheh Shamia”. Falë kontributit tuaj, Medreseja është sot këtu ku është! Për këtë ju shpreh mirënjohjen time më të thellë”- ka thënë ndër të tjera Myftiu.
           
Në bisedën e tij, Imam Muhamed Sytari ka kërkuar që “Islamic Relief” të vazhdojë të jetë prezent në Shkodër me projekte të shumta që kanë në thelb forcimin e besimit dhe bamirësinë ndaj njeriut. Myftiu ka kërkuar nga z. Tahmazov që të tërheqë edhe fondacione dhe shoqata të tjera bamirëse që të investojnë në Shkodër.
           
Nga ana e tij, koordinatori i I.R., për Ballkanin, z. Ismail Tahmazov, pasi ka falënderuar Myftiun për pritjen ka shprehur gatishmërinë e fondacionit që ai përfaqëson për të vazhduar me prezencën e tij në Shkodër me projekte të dobishme për shoqërinë e këtij qyteti.
           
Ai ka shprehur mirënjohjen e tij për mbështetjen e Myftinisë të shprehur në drejtim të “Islamic Relief”.           

Në këtë takim, z. Tahmazov shoqërohej edhe nga drejtori i “Islamic Relief” për Shqipërinë, z. Muhammed El-Waei, i cili ka dhënë një kontribut të madh në realizimin e shumë projekteve bamirëse në Shkodër.