Paraditen e së martës, më 22 mars 2011, Myftiu Imam Muhamed Sytari ka pritur në një takim pune Famullitarin e Kishës Ortodokse në Shkodër, At Nikolla Petani. Gjatë takimit dy drejtuesit fetarë kanë diskutuar për temën e ditës, që ka shqetësuar prej kohësh dy komunitetet fetare, atë musliman dhe atë ortodoks, pronat vakëf.
           
Gjatë takimit është folur për vijimin e përpjekjeve për kthimin në identitet të pronave legjitime të dy komuniteteve fetare, nëpërmjet iniciativave fetare që kanë në thelb sensibilizimin e opinionit besimtar dhe më tej në lidhje me këtë problem jetik për Myftininë dhe Kishën Ortodokse.
           
Në një konferencë të përbashkët para mediave të pranishme, Myftiu dhe Famullitari kanë deklaruar shqetësimin e tyre të përbashkët dhe kanë sqaruar se këto takime do të vijojnë edhe më tej për të arritur në fitimin e të drejtave të mohuara prej dekadash.
           
Në fjalën e tij, Myftiu ka deklaruar se ky realitet i hidhur mbi këto prona të shenjta fetare dëshmon shenjat e një kryqëzate të sofistikuar moderne me silenciator!           

Myftiu dhe Famullitari kanë deklaruar se këto përpjekje, nuk kanë asgjë të përbashkët me komentet e disa mediave që duan ta politizojnë këtë lëvizje të dy komuniteteve fetare në Shkodër. Ata thanë, se kjo është një nga lëvizjet zinxhir, që ka nisur këtu e 21 vite më parë.