Hytbeja e xhumasë, më 18 mars 2011 ishte vijim i deklaratës së para dy ditëve, ku Myftiu i Shkodrës Imam Muhamed Sytari ka ngritur zërin për një mori padrejtësishë dhe zullumesh që i janë bërë bërë pronave vakëf të muslimanëve të Shkodrës.
           
“Gjatë ditës së djeshme, të shumtë ishin ata që pyetën: “Politikën e kujt po bën Myftiu i Shkodrës?”, të ndikuar edhe nga disa komente me ngjyresë politike që iu bënë deklaratës së para dy ditëve. U them: Myftiu i Shkodrës bën politikën e interesave të Islamit dhe të muslimanëve të Shkodrës!”- kështu e ka nisur hytben e tij të kësaj jave Myftiu Imam Muhamed Sytari.
           
Më pas, ai ka vijuar të flasë për vlerën e pasurisë dhe shenjtërinë e pronës, sipas mësimeve të Kur’anit dhe fjalëve të profetit Muhammed (a.s).
           
Duke u thelluar më shumë në trajtimin e temës, Myftiu është rikthyer me vëmendjen e të pranishmëve të problemi i pronave vakëf, të cilat janë nëpërkëmbur që 44 vjet. Myftiu ka përmendur një listë të gjatë me problematikat e shumta të vakëfit në Shkodër dhe ka bërë thirrje që këto çështje të marrin fund sa më parë.
           
Në hytben e tij, Myftiu ka përmendur edhe deklaratën e djeshme të famullitarit të Kishës Ortodokse në Shkodër, At Nikolla Petani, të cilin e ka falënderuar, duke vërtetuar në këtë mënyrë se këto dy komunitete janë realisht më të dëmtuarat dhe më të persekutuarat përsa i përket çështjes së pronave.
           
Myftiu ka bërë thirrje që njerëzit të mos harrojnë amanetin e baballarëve dhe ka kërkuar që besimtarët të luten që All-llahu me Madhërinë e Tij ta zgjidhë këtë ngërç me pronat e vakëfit në Shkodër.