Shkodër, më 16 mars 2011

Jam sot para jush për të shprehur indinjatën e thellë për persekucionin fetar që po ushtrohet që nga viti 1967 mbi pronat e muslimanëve shqiptarë, e në mënyrë të veçantë mbi vakëfet e Shkodrës.
           
Nëse për 23 vite me radhë Myftinisë Shkodër iu sekuestruan dhe iu shkatërruan pronat e saj, duke përfshirë xhami e objekte të tjera, gjatë këtyre 21 viteve po bëhet një batërdi e vërtetë mbi këto prona.
           
Me dhjetëra e qindra dosje me pronat e Myftinisë tonë që akoma sot nuk kanë marrë asnjë përgjigje. Bëjnë një gjumë të parehatshëm në zyrat e gjykatave, agjencive të kthimit të pronave etj. Me dhjetëra troje të uzurpuara padrejtësisht nga njerëz me përkrahje nga pushtetet e këtyre 21 viteve.
           
Nuk është larg vëmendjes tuaj zullumi me hotel “Rozafën”, ku Myftinia, Kisha Ortodokse dhe disa familje shkodrane janë pronarë të vërtetë të truallit të saj. Sot e gëzojnë njerëz me pushtet, që vijnë të na urojnë edhe bajramet. Do të isha i lumtur të mos i shikoja më fytyrat e tyre në gëzimet tona!
           
Në Zdralej, Qendra Tregtare e Myftinisë tonë po ngelet peng e meskinitetit dhe degradimit të pushtetit lokal, që nuk zbaton një urdhër të prerë të Gjykatës së Apelit në favor të Myftinisë tonë. Nuk ka rekurs në botë të legjitimojë haramin që konsumohet muaj për muaj mbi pronën tonë në atë zonë.
           
Në Zogaj, një individ që ka grabitur pronën tonë, sfidon një Myftini, një Bashki, një Polici!? Pranë xhamisë së Plumbit i njëjti realitet.
           
Shembuj të tjerë flenë në sirtarët e zyrave të pushtetarëve burokratë të këtij vendi.
           
Ta dinë pushtetarët, që u mbaron mandati me 8 maj të këtij viti dhe të tjerë pos tyre, se Myftinia Shkodër është e vendosur të mos heshtë përballë padrejtësive 44 vjeçare të kësaj kryqëzate moderne ndaj saj. Ne nuk jemi aspak të hutuar as ndaj zhvillimeve të vendit dhe politikave të tij.
           
I bëj apel të gjithë atyre që duhet të dëgjojnë sot zërin tonë, të marrin masa të menjëhershme për prishjen e objekteve të paligjshme në Zogaj, në Zdralej etj, para se kjo neglizhencë e qëllimshme ndaj pronave tona të nxisë reagime demokratike që askujt s’do t’i pëlqenin, sidomos në këtë periudhë në prag të zgjedhjeve lokale!
           
Ku është prioriteti që kryeministri i vendit tonë i ka dhënë komuniteteve fetare, duke fituar mirënjohjen tonë, por që nuk zbatohet nga burokratët e vegjël që vegjetojnë manekinisht në zyrat e tyre?!
           
Njëkohësisht, ju lajmëroj se hytbeja e xhumasë së kësaj jave do të jetë një thirrje sensibilizuese për krejt xhematet e Shkodrës, ndaj zullumeve primitive të përvitshme mbi pronat tona.   

Faleminderit!