Paraditen e së martës, më 15 mars 2011, Myftinia Shkodër ka nisur shpërndarjen e disa ndihmave ushqimore për banorët e përmbytur në zonën e fshatit Belaj.
           
Në krye të këtij aksioni bamirës, teologu Arben Halluni ka deklaruar për mediat, se megjithëse përmbytja ka kaluar, ne e kemi për detyrë të vazhdojmë të ndihmojmë e të japim kontributet tona bamirëse për të mbyllur sa më shpejt një plagë të madhe që kanë përjetuar këta banorë. Ai ka theksuar gjithashtu se Myftinia Shkodër ka kontaktuar me fondacione e shoqata të ndryshme bamirëse për të tërhequr ndihma për këta banorë dhe të tjerë nevojtarë që jetojnë në skamje në këto zona.           

Theksojmë se ndihmat e shpërndara sot për banorët e kësaj zone, pa dallim feje, janë pjesë e ndihmës bamirëse të ardhur nga “El-Hilal” i Shkupit dhe disa organizata të tjera bamirëse islame shqiptare në Maqedoni e Zvicër.