Paraditën e së hënës, më 14 mars 2011, në xhaminë e fshatit Velinaj është zhvilluar një ceremoni fetare me rastin e përkujtimit të lindjes së hz. Muhammedit (a.s).
           
Aktiviteti ka nisur me fjalën përshëndetëse të imamit të xhamisë, Ajet Sukaj, i cili pasi ka falënderuar pjesëmarrësit për praninë e tyre, ka thënë se qëllimi i këtij tubimi është të përkujtojmë All-llahun dhe të afrohemi me dashurinë e Tij. Njëkohësisht ai ka theksuar se tubime të tilla janë argument i dashurisë për All-llahun dhe dëshmi e përkushtimit ndaj Tij.
           
Më pas fjalën e ka marrë Myftiu Imam Muhamed Sytari. Pasi ka përshëndetur të pranishmit, Myftiu ka hedhur dritë mbi argumentin e lehtësimit dhe tolerancës, me të cilat u dërgua profeti Muhammed (a.s). “Argumente të shumta në Kur’an vërtetojnë se Islami është fe e lehtësimit dhe e tolerancës. All-llahu na ka treguar në Librin e Tij se kjo fe nuk është rëndesë dhe vështirësi, por lehtësim dhe tolerancë për besimtarin! Prandaj, është detyrë e jona si muslimanë mos të stepemi në jetë për ta dëshmuar fenë tonë haptas, pa ndrojtje e frikë nga kushdo!”- ka thënë ndër të tjera Myftiu.

Këtë tubim e ka përshëndetur edhe imami i xhamisë “Ebu Bekër”, teologu Idmir Plaku, që ka folur mbi vlerën dhe madhështinë e misionit me të cilin u dërgua Muhammedi (a.s), si mëshirë për mbarë botërat.

Ilahitë e bukura dhe pjesët e mevludit i kanë dhënë një atmosferë të këndshme xhamisë dhe të pranishmëve. Ndërkohë, një program nga fëmijët e kësaj xhamie e ka zbukuruar edhe më shumë këtë aktivitet.

Të pranishmit kanë falur edhe namazin e mesditës me xhemat nën drejtimin e Hafiz Musa Hoxhës. Më pas, ata janë përshëndetur duke uruar njëri-tjetrin për kënaqësinë e këtij aktiviteti.