Paraditën e së hënës, më 7 mars 2011, në xhaminë e fshatit Kullaj është zhvilluar një ceremoni fetare me rastin e përkujtimit të lindjes së profetit Muhammed (a.s).
           
Aktiviteti ka nisur me një fjalë përshëndetëse të mbajtur nga imami i xhamisë, H. Kujtim Cufaj. Pasi ka përshëndetur të pranishmit, ai ka falënderuar pjesëmarrësit, të cilët kishin lënë punët e tyre të përditshme për të marrë pjesë në këtë aktivitet fetar.
           
Më pas, imami ka ftuar Myftiun e Shkodrës për të mbajtur fjalën e rastit. Gjatë saj, Imam Muhamed Sytari ka folur mbi vlerën që ka organizimi i tubimeve që ftojnë njerëzit për t’u thelluar në besim e në kulturën e tij. Ndër të tjera, Myftiu ka thënë: “Prej mirësive të shumta që kanë këto tubime është edhe fakti se njerëzit vijnë me dëshirë të madhe për të marrë dritë besimi, prehje shpirtërore dhe mbi të gjitha për të përkujtuar All-llahun dhe të dërguarin e Tij. Edhe sikur të mos ishin këto tubime të begata, do të ishte obligim për ne t’i shpiknim, si e si të tuboheshim sëbashku për dashurinë e All-llahut dhe të dërguarit të Tij!”.           

Aktiviteti ka vijuar me këndimin e disa pjesëve të Mevludit dhe disa ilahi të përzgjedhura nga H. Sami Muçej. Pas faljes së namazit të mesditës, të pranishmit janë përshëndetur me Myftiun dhe imamin e xhamisë dhe kanë uruar që takime të tilla të jenë sa më të shpeshta.