Dita e xhuma, më 4 mars 2011 ka qenë një ditë e veçantë për besimtarët frekuentues të xhamisë së Medresesë. Kjo për faktin se hytbeja e xhumasë së sotme mbante numrin 100, nga momenti i hytbes së parë me datë 20 mars 2009. Me këtë rast, Myftinia Shkodër ka ftuar besimtarë të shumtë për të marrë pjesë në faljen e kësaj xhumaje dhe dëgjimin e hytbes së mbajtur nga Myftiu i Shkodrës.
           
Në fjalën e tij para të pranishëmve të shumtë, Myftiu Imam Muhamed Sytari ka theksuar se e xhumaja e sotme është një ditë e lumtur dhe veçantë, një e xhuma jubilare, pasi edhe hytbeja e saj mban numrin 100. Ai ka vazhduar, duke thënë se: “Nuk ka shumë rëndësi numri i saj, por fakti se Shkodra është zbukuruar me një xhami model, të pajisur me të gjitha kushtet dhe orenditë e duhura për një faltore, ku njerëzit vijnë për të gjetur sadopak prehje, qetësi e klimë adhurimi. Me rastin e kësaj xhumaje jubilare, e ndjej për detyrë të falënderoj të gjithë ata që kontribuan për ta hijeshuar Shkodrën me këtë xhami të re, në krye të të cilëve qëndron hoxha i dashur Osman ef. Nuri Topbash, të cilin e falënderojmë nga zemra dhe i shprehim një mirënjohje të thellë për këtë bamirësi të madhe!”
           
Më pas, në hytben e kësaj xhumaje, Myftiu ka vijur të flasë për mirënjohjen dhe vlerat që ka ajo për njeriun në këtë jetë. Në hytben e tij, ai është ndalur në tre stacione të rëndësishme, ku ka përmendur kohën, shëndetin dhe pasurinë. Nëpërmjet argumenteve të ndryshme, Myftiu ka thënë se: “Kushdo që e shfrytëzon kohën, shëndetin dhe pasurinë duke i vënë në shërbim të asaj që na udhëzon feja dhe mësimet e saj, është mirënjohës ndaj Zotit për këto mirësi. E, kushdo që abuzon me to, ai në të realitet vërteton mosmirënjohjen e tij karshi Zotit!”.
           
Hytbeja nr. 100 në xhaminë e re të Medresesë, është ndjekur edhe nga media lokale dhe është komentuar edhe në edicionet e lajmeve të kësaj dite.