Paraditën e së enjtes, më 3 mars 2011, në xhaminë e fshatit Muriqan është organizuar një ceremoni fetare me rastin e përkujtimit të lindjes së hz. Muhammedit (a.s).
           
I pranishëm në këtë aktivitet fetar ka qenë, Myftiu i Shkodrës Imam Muhamed Sytari, pasi ka falënderuar imamin e kësaj xhamie, H. Vehbi Dani, për idenë dhe organizimin, ka thënë se është obligim i muslimanëve të mblidhen herë pas here për të përkujtuar të dashurin e Zotit, Muhammedin (a.s). Myftiu ka kërkuar që kjo traditë e vyer fetare të shërbejë për të lidhur përherë e më shumë njerëzit, rininë në mënyrë të veçantë, me mësimet e fesë dhe traditat e saj. Ai ka thënë se nuk është e ndaluar të mblidhemi për t’i kënduar dashurisë për All-llahun dhe për të dërguarin e Tij.
           
Në fjalën e tij, Myftiu ka folur edhe për rëndësinë që kanë tubimet fetare ku përmendet All-llahu dhe i dërguari i Tij. Ai ka përmendur hadithe dhe fakte të tjera që e nxisin këtë veprim dhe vlerësojnë shpërblimin e tij.
           
Pjesë e këtij aktiviteti ka qenë edhe këndimi i disa pjesëve kur’anore, ilahive dhe pjesëve të mevludit, që janë sjellë me shumë emocion nga kënduesit: H. Shukri Kapllan, H. Vehbi Dani, H. Sami Muçej, H. Qamil Ujkaj, H. Ramazan Avxhë dhe H. Xhavit Sokoli.
           
Një moment shumë i këndshëm i këtij aktiviteti ka qenë edhe programi i pasur fetar i fëmijëve të kursit të xhamisë së Muriqanit, të përgatitur me shumë përkushtim nga imami i xhamisë. Në programin e tyre ka spikatur përgatitja dhe deklamimi i sureve dhe rregullave të ndryshme fetare.
           
Pas faljes së namazit të drekës me xhemat, të pranishmit janë tubuar në një sofër vëllazërore të shtruar nga vetë besimtarët e kësaj xhamie me rastin e këtij aktiviteti fetar.