Ditën e xhuma, më 25 shkurt 2011, Imam Muhamed Sytari ka mbajtur hytben e xhumasë në xhaminë e fshatit Dragoç, ku ka folur mbi nevojën e moralit profetik në jetën e përditshme.
           
Në hytben e tij, Myftiu ka vënë theksin te nevoja që kanë muslimanët sot për të kuptuar rëndësinë e përvetësimit të moralit të hz. Muhammedit (a.s), si shembulltyra më e suksesshme dhe më garante në historinë e njerëzisë.
           
Myftiu ka ftuar të pranishmit për të medituar dhe kuptuar thellë hadithet që ftojnë për rregullimin e sjelljes dhe marrëdhënies tonë në shoqëri. Në fjalën e tij, ai ka përmendur: “Në një prej haditheve të tij në lidhje me këtë temë, pejgamberi jonë urdhëron e thotë: “Njerëzit më besimplotë janë ata që janë të mirëedukuar dhe më i buti i tyre me familjen e tij”. Hadithi në fjalë është një kulm, prej kulmeve të nxitjes për të përmirësuar sjelljen dhe komunikimin tonë ditor me ata që na rrethojnë, sidomos me familjen dhe fëmijët tanë, që janë amanet. Kur u pyet i dërguari i All-llahut se cilat janë gjërat që na afrojnë më së shumti me xhennetin, ai tha: “Përkushtimi dhe mirësjellja!”, duke na nxitur drejt përkujdesjes për mirësjelljen dhe shfaqjen tonë të sinqertë në shoqëri”.
           
Gjatë hytbes së kësaj xhumaje, Myftiu është ndalur në stacione shumë të rëndësishme që kanë të bëjnë me realitetin e marrëdhënieve të muslimanëve me njëri-tjetrin, duke dhënë zgjidhjet e duhura nga tradita profetike.
           
Pas përfundimit të xhumasë, Myftiu i është përgjigjur edhe pyetjeve të disa prej besimtarëve, të cilët janë interesuar për të ditur më shumë rreth përmbajtjes së hytbes dhe interesave të muslimanëve të kësaj zone.
           
Në shoqërinë e imamit të xhamisë, z. Shkëlqim Sykja, Myftiu ka inspektuar edhe pronën vakëf të kësaj xhamie, një pjesë e mirë e së cilës është zaptuar padrejtësisht nga njerëz të papërgjegjshëm. Me këtë rast, Myftiu ka thënë se "nuk do të tolerohet askush, që me arrogancën e tij ka zaptuar tokën e shenjtë të muslimanëve!"

Ai ka theksuar se jo vetëm në Dragoç, por edhe në shumë vende të tjera të Shkodrës, abuzimi i pushtetarëve dhe i njerëzve me moral komunist është shumë i madh në hak të pronave të Myftinisë Shkodër. “Zoti na u bëftë ndihmë në përpjekjet tona për të marrë atë që na takon! Atij i ankohemi për zullumet e panumërta ndaj komunitetit tonë!”- ka përfunduar Myftiu.