Paraditën e së enjtes, më 24 shkurt 2011, Myftiu Imam Muhamed Sytari ka zhvilluar një takim pune në zyrën e Prefektit të Skodrës, z. Maxhid Cungu.
           
Temë e këtij takimi kanë qenë disa çështje që lidhen me të drejtat e muslimanëve dhe Myftinisë Shkodër, si ajo e dëmshpërblimit të xhamive të përmbytura në dhjetor 2010 e disa çështje të tjera që kanë të bëjnë edhe me raportet fetare dhe ruajtjen e harmonisë qytetare në Shkodër.
           
Gjatë takimit, Myftiu ka theksuar se dëmet e shkaktuara nga përmbytjet, në shumë prej xhamive të qytetit dhe në fshatra janë të konsiderueshme. Ai ka kërkuar që mos të lihet pas dore haku dhe e drejta e shtëpive të Zotit në Shkodër.
           
Në këtë takim ai ka vënë në dukje se angazhimi i Myftinisë Shkodër për ruajtjen e harmonisë fetare e qytetare është maksimal, përtej çdo orientimi a politike që përpiqet të ftohë e të tensionojë këto marrëdhënie pa shkak, në Shkodër e Shqipëri. Myftiu ka vlerësuar kontributin e drejtuesve qëllim-mirë të institucioneve të tjera fetare në Shkodër, që nuk ngurrojnë t’i përgjigjen ftesave ndërtuese në shërbim të harmonisë dhe frymës së bashkëpunimit në këtë qytet.
           
Edhe Prefekti i Shkodrës, ka theksuar se po bëhen përpjekje maksimale për kompensimin e dëmeve të shkaktuara nga përmbytjet e para pak muajve në Shkodër, në çdo xhami e faltore të dëmtuar.           

Prefekti ka vlerësuar njëkohësisht rolin e Myftinisë Shkodër dhe kontributin e saj për forcimin e vlerave dhe virtyteve në shoqërinë tonë.