Paraditën e së mërkures, më 23 shkurt 2011, Imam Muhamed Sytari ka pritur në një takim të përzemërt Famullitarin e Kishës Ortodokse në Shkodër, At Nikolla Petani.
 
Në bisedën e zhvilluar, dy drejtuesit e lartë fetar, kanë diskutuar rreth realitetit të marrëdhënieve në mes të Myftinisë dhe Kishës Ortodokse. Ata kanë vlerësuar frymën e harmonisë në mesin e besimtarëve dhe qytetarëve në Shkodër dhe kanë konkluduar se është e domosdoshme të thellohet bashkëpunimi në mesin e institucioneve fetare në shërbim të kësaj fryme harmonie që e bën vendin tonë të jetë shembull edhe për shumë vende të tjera në mbarë botën.
           
Gjatë bisedës së tij, Imam Muhamed Sytari ka theksuar se prezenca e besimeve të ndryshme dhe institucioneve përkatëse që punojnë për të mirën e besimtarëve dhe frymës së harmonisë, është një pasuri kombëtare për Shqipërinë dhe shqiptarët. Ai ka theksuar gjithashtu se është obligim dhe detyrë e prijësve fetarë, në Shkodër e përtej saj, të ruajnë, të kultivojnë e të punojnë pa lodhje për harmoninë ndërfetare në këtë vend.
           
Në këtë takim është diskutuar edhe për mundësinë e organizimit të aktiviteteve të përbashkëta në mes të Myftinisë, Kishës Ortodokse dhe asaj Katolike, në shërbim të çështjeve që shqetësojnë sot rininë dhe shoqërinë shqiptare.  

Myftiu dhe Famullitari kanë qenë të mendimit se roli i drejtuesve fetarë dhe i komuniteteve përkatëse duhet të jetë më aktiv në këtë drejtim, duke bashkëpunuar për të mirën e kësaj shoqërie dhe dhënien e zgjidhjeve për shumë probleme që e shqetësojnë atë, në thelb të së cilave qëndron largimi nga Zoti, feja dhe besimi.