Paraditën e së hënës, më 21 shkurt 2011, Myftiu i Shkodrës Imam Muhamed Sytari ka zhvilluar një takim pune me Kryetarin e Bashkisë Shkodër, z. Lorenc Luka, në zyrën e qytetarit të parë të kryqendrës veriore.
           
Gjatë këtij takimi, që ka zgjatur mbi një orë, Myftiu dhe Kryebashkiaku i Shkodrës kanë diskutuar për tema të ndryshme që kanë të bëjnë me qytetin, harmoninë, problemin e pronave të Myftinisë dhe ndërtimeve pa leje në trojet e saj, si: në Zdralej, Zogaj e në disa vende të tjera, ku njerëz të papërgjegjshëm kanë zaptuar këto troje.
           
Në bisedën e tij, Myftiu ka kërkuar mbështetjen dhe përkrahjen e Bashkisë Shkodër, në ato çështje që janë kompetencë e saj, sidomos në ato raste që kanë të bëjnë me zaptimin e paligjshëm të pronave të Myftinisë. Ai ka përmendur se bashkëpunimi në mes dy institucioneve është në nivele të mira dhe se detyra e drejtuesve të institucioneve shtetërore në Shkodër është të shikojnë me përparësi shqetësimet dhe nevojat ligjore të institucioneve fetare në vend. Ai ka përmendur gjithashtu se gjatë këtyre dy dekadave të fundit është bërë shumë padrejtësi në hak të pronave të muslimanëve dhe ka kërkuar asistencë maksimale nga zyrat e ndryshme shtetërore në Bashkinë e Shkodrës, që shpesh neglizhojnë me hakun e Myftinisë Shkodër.
           
Nga ana e tij Kryetari i Bashkisë Shkodër ka vlerësuar rolin pozitiv që luan Myftinia Shkodër në ruajtjen dhe kultivimin e frymës së harmonisë në mesin e qytetarëve, nëpërmjet aktiviteteve, bisedave dhe predikimeve fetare etj. Njëkohësisht, ai e ka garantuar Myftiun se Myftinia Shkodër do të ketë mbështetjen e Bashkisë në çdo projekt a inisiativë në shërbim të interesave qytetare në Shkodër.
           
Në këtë takim është folur edhe mbi marrëdhëniet e komuniteteve fetare në Shkodër dhe rolin elitar që po luan Myftinia Shkodër në këtë drejtim.