Dita e hënë, më 14 shkurt 2011, ka shënuar fillimin e aktiviteteve të larmishme me rastin e përkujtimit të lindjes së profetit Muhammed (a.s). Pikërisht në këtë ditë të bukur, Myftinia Shkodër ka organizuar një aktivitet fetar në xhaminë “Ebu Bekër”, e cila ishte mbushur nga besimtarë e besimtare, të rinj e të reja, të cilët kishin ardhur për të marrë pjesë në këtë ceremoni tradicionale.
           
Në këtë aktivitet ka përshëndetur Myftiu i Shkodrës Imam Muhamed Sytari dhe imami i xhamisë “Ebu Bekër”, teologu Idmir Plaku. Në fjalën e tij, Myftiu ka theksuar se fakti i dërgesës profetike të Muhammedit (a.s) në fundin e zinxhirit të gjatë të profetësisë, do të thotë për ne muslimanët se ka ardhur koha të jemi vula e kësaj shoqërie. Ai ka theksuar se çdo musliman shqiptar, gjatë leximit të ajetit që e përkufizon Muhammedin (a.s) si vulë të profetëve, duhet të mendojë të bëjë më të mirën për të qenë koka e shoqërisë së tij në krejt drejtimet e saj, jo njeri pa vlerë, pa dobi e pa peshë. Ai ka uruar të pranishmit dhe mbarë botën islame me rastin e kësaj ngjarje të shënuar.
           
Ndërkohë në fjalën e tij, teologu Idmair Plaku, ka theksuar se Muhammedi (a.s) ishte shembull i harmonisë në çdo drejtim të jetës. Ai ishte prijës i drejtë dhe i urtë. Ai thirri për harmoni jo vetëm në mesin e muslimanëve por edhe në raport me besimtarët e feve të tjera. Prandaj sot, më shumë se kurrë, ne e kemi për detyrë ta ndjekim dhe ta pasojmë traditën dhe mësimet e tij.
           
Aktiviteti ka vazhduar me këndimin e disa pjesëve nga Mevludi dhe disa ilahi, nga S. Muçej, V. Dani, Sh. Kapllan, R. Lika dhe Q. Ujka.
           
Aktiviteti është përshëndetur edhe nga Myftiu i Nderit i Shkodrës, H. Faik Hoxha, i cili pasi ka uruar të pranishmit për këtë datë të shënuar, ka nxitur dashurinë dhe përkutjimin sa më shumë të profetit Muhammed (a.s). Ai ka thënë, se një musliman i mirë duhet ta shtojë salavatin dhe ta ketë pjesë të pandarë të dhikreve ditore.
           
Një moment shumë emocionues i këtij aktiviteti fetar ka qenë prezantimi i “Qimes së Pejgamberit”, e cila është trashëguar nga shekujt e mëparshëm në Shkodër dhe është pjesë e traditave të hershme të hoxhallarëve të saj. Të pranishmit, të shoqëruar me këndimin e salavatit, e kanë vizituar dhe puthur këtë gjurmë të profetit (a.s), duke shprehur njëkohësisht emocion dhe dashuri për të dërguarin mëshirë.
           
Në fund, të pranishmit kanë patur mundësi të vizitojnë edhe një ekspozitë me libra dhe gjurmë të traditës profetike në gjuhë të ndryshme të botës, sikurse kanë marrë si dhuratë librin biografik: “Muhammedi i dërguari i fundit”, me autor studiuesin Mexhid Ali Kan.
           
Ky aktivitet ka dhuruar emocione dhe ka krijuar një atmosferë të ngrohtë besimi në ambientet e xhamisë “Ebu Bekër”.