Ditën e dielë, më 13 shkurt 2011, nëpërmjet valëve të Tv1 Channel, teleshikuesit kanë patur mundësinë të ndjekin për rret një orë bashkëbisedimin që teologu Arben Halluni ka zhvilluar me Myftiun e Shkodrës Imam Muhamed Sytari, në një emision të posaçëm në përkujtim të lindjes së hz. Muhammedit (a.s), të titulluar: “Të përkujtojmë profetin e Islamit, Muhammedin (a.s)”.
           
Gjatë këtij bashkëbisedimi, Myftiu ka shpjeguar domethënien e Mevludit dhe rëndësinë që ka organizimi i tubimeve fetare që risjellin në vëmendje të besimtarëve personalitetin e profetit Muhammed, të dërguarit të fundit të Zotit në tokë, si mëshirë për mbarë krijesat. Ai ka thënë se qëllimi i organizimit të mevludeve dhe përkujtimit të jetës së Muhammedit (a.s) është mundësimi i gjetjes së një brezi të shëndoshë muslimanësh, që me përkushtimin dhe forcën e Muhammedit (a.s) e ndërtojnë vendin dhe shoqërinë e tyre.
           
Myftiu i është përgjigjur edhe pyetjes në lidhje me veçoritë dhe cilësitë morale me të cilat karakterizohej Muhammedi (a.s), para se të dërgohej si profet. Ai ka përmendur se gjatë gjithë jetës së tij, Muhammedi (a.s) ka qenë shembull i përkujdesjes hyjnore ndaj personit të tij. Ndonëse ai u lind jetim dhe mbeti jetim që në moshë të vogël, All-llahu i Madhëruar u përkujdes për të dhe edukimin e tij, sikurse edhe vetë profeti (a.s) ka thënë.
           
Myftiu është ndalur edhe te cilësitë e Muhammedit (a.s) pas dërgesës profetike, duke e konsideruar atë si një njeri me cilësi të jashtëzakonshme, me një urtësi të pashembullt dhe një largpamësi të rrallë.           

Në fund të këtij bashkëbisedimi, Myftiu ka bërë një urim të përzemërt për mbarë muslimanët e Shkodrës, Shqipërisë dhe krejt botës islame me rastin e kësaj ngjarje të shënuar në historinë islame.